بعد اعتزالها التمثيل.. منى جبر لـ القاهرة 24: هكمل في التدريس.. وعلاقتي بربنا متخصش حد
تحدثت الفنانة منى جبر، عن السبب الرئيسي وراء اعتزالها الفن، قائلة: إنها تفرغت بـ الكامل لأسرتها، هذا بالإضافة إلى عملها في التدريس، مؤكدةً أنها لن تتراجع عن موقفها.
وأضافت منى جبر خلال حوارها مع القاهرة 24: قدمت كل اللي عندي، وشايفة إن اعتزالي دلوقتي أفضل، وهكمل في التدريس، عشان متجدد ومعنديش حاجه أديها تاني لـ الفن، التدريس بالنسبالي هو الحياة لأني بدي من نفسي لأجيال ومهنة جميلة.
أما عن الاعتزال لأسباب دينية، أوضحت: مش بعتزل عشان أتفرغ لـ العبادة، لأنها شيء ثابت وحاجه بيني وبين ربنا، ومحدش يخصه علاقتي بـ ربنا، والجمهور هيتمنى لي الخير لأني حابة اعتزل، وشايفة إن ده الخير ليا، ومستحيل أرجع تاني خلاص، وهتفرغ لـ حياتي الشخصية.
وسبق أن تحدثت منى جبر في تصريحات تلفزيونية عن اعتزالها، حيث قالت: في المجال الفني بيجيلك لحظة عارف إنك مش هتقدر تقدم حاجة أكتر، فأخدت قرار الاعتزال وموحشنينش التمثيل وجمهوري أكيد هيقدر إني إنسانة طبيعية، ولو اتعرض عليا دور كبير جدًا مش هرجع حتى لو هاخد أوسكار.
أعمال منى جبر
وعلى الجانب المهني، شاركت منى جبر في عدد من الأعمال الفنية المتميزة، أشهرها فيلم الحفيد، من بطولة: الفنانة كريمة مختار، عبد المنعم مدبولي، نور الشريف، ميرفت أمين، محمود عبد العزيز، وحيد سيف، ومن تأليف عبد الحميد جودة السحار، وإخراج عاطف سالم.
