بعد أزمة بيع مطعم صبحي كابر.. قصر الكبابجي: مش إحنا المطعم الشهير اللي اشتريناه
علق قصر الكبابجي على أزمة بيع مطعم صبحي كابر، الشهير في روض الفرج، وذلك بعد تعرضه للنصب.
وقال حساب قصر الكبابجي على موقع التواصل الاجتماعي فيس بوك: كلنا في حالة صدمة من اللي حصل لـ صبحي كابر، واللي يعتبر من أهم رواد المطبخ المصري حديثًا.
وأضاف: البعض يريد بشكل أو بآخر أن يضع اسم قصر الكبابجي في جملة مفيدة لأغراض لا يعلمها الا الله، حتى نكون سبب ضرر أو أذى لأي شخص كان، ويشهد الله أننا عمرنا ما عملنا ولا هنعمل ده.
وأكمل: مش إحنا المطعم الشهير اللي يقصده المعلم صبحي، بكل صراحة ووضوح إحنا بعيد جدًا عن الموضوع ده.. ويمكن إحنا المكان الوحيد اللي دعمنا منافسينا مرة واتنين وتلاتة هنا على الصفحة، واللي متابعنا عارف كويس.
واختتم: الهدف من المنشور دعم المعلم صبحي اللي سبقنا في المجال، ومحاولة لإخماد نار إشاعة هتحطنا في مكان البزنس مان الشرير بتاع المسلسلات اللي بيصحى الصبح يشرب سيجار كبير وهو لابس الروب على البدلة، ويشوف هيأذي كام واحد انهاردة، كفاية دراما أرجوكم.
أزمة بيع مطعم صبحي كابر
وفي وقت سابق، كشف صبحي كابر صاحب مطعم صبحي كابر الشهير في روض الفرج، تفاصيل تعرضه للنصب، ما اضطره لبيع المطعم، مؤكدًا انتهاء الأزمة وافتتاحه لـ مطعم جديد قريبًا.
وقال كابر في تصريحات خاصة لـ القاهرة 24، إنه تعرض لواقعة نصب كبيرة، وكانت في صفقة ذرة، وهو الأمر الذي تسبب في تعثره ماليًا، ولم يجد أمامه سوى بيع المطعم، مشيرًا إلى أنه باع المحل فقط وليس “براند صبحي كابر”.
وأضاف: أنا اتذليت قوي، والناس اللي بعت ليهم المحل خلوني كومبارس عندهم، وأعمل ليهم فيديوهات.. وصفحة الفيس بوك والمزارع وبراند الاسم كله ده لسا بتاعي، اللي اتباع بس هو المحل، وقريب هرجع أقوى من الأول زي ما بدأت على باب الله، وأنا بطمن الناس عليا.
