أمير توفيق: الخوض في الذمة المالية مفيهاش مجال للتنازل.. والقندوسي فوض 3 وكلاء بينهم أحمد يحيى
علّق أمير توفيق المدير التنفيذي لشركة الكرة في النادي الأهلي، ومدير التعاقدات السابق بالنادي، على تصريحات أحمد القندوسي لاعب الفريق المُعار إلى سيراميكا كليوباترا في الوقت السابق.
تصريحات أمير توفيق
وقال أمير توفيق في تصريحات تليفزيونية: تصريحات القندوسي كانت صعبة ومش منطقية ومكنش ينفع نعدي حاجة زي كده بالشكل ده أنت بتتكلم في حاجة قوية وتقيله، والكلام مش معقول وحط تحته مليون خط، والنادي عمل تحقيق في الموضوع لأنه كان لازم يوضح للناس كلها إننا شغالين بنظام وإننا نادي مؤسسي.
وأضاف: أول حاجة عملتها كلمت كابتن محمد رمضان ومتكلمتش مع الخطيب، والذمة المالية مفيهاش مجال للتنازل وأنا شغال في كيان كبير والكيان ليه نظامه ومكنش ينفع أتكلم غير بعد قرار التحقيقات بتاعة الأهلي ولو أنا طلعت قبل البيان أنا كده مكنتش هبقا بحترم كيان الأهلي.
وأكمل أمير توفيق: عندنا في النادي ثوابت معينة والنادي تحرك بسرعة جدًا ومحمد رمضان كان عنده وجهة نظر إنه كان عاوز مواجهة تحصل بيني وبين قندوسي ووكيله وأنا كنت حابب ده، ولكن مسئول الشئون القانونية قال لأ وإن كل واحد يظهر لوحده والحمد لله ربنا أظهر الحق في النهاية.
وواصل توفيق: الأهلي ليس طرفًا في صراع وكلاء القندوسي، ووكلاء القندوسي اللي موجودين من الأول جعفر وعلي النيساني، وفي شهر 11 سنة 2022 القندوسي مضى عقد تفويض مع علي النيساني وأحمد يحيى والعقد ده موجود فيه النادي الأهلي ونادي الزمالك والنادي المصري، والأهلي في الوقت ده مكنش شايف القندوسي أصلًا وكنا بندوّر على مهاجم.
وأردف أمير توفيق: كنا بنتكلم إننا نجيب موليكا والموضوع كان بعيد وجالي تكليف من عدلي القيعي إننا هنغير وجهة نظرنا من تركيا للجزائر يوم 24 يناير 2023، وحصل تواصل بين الأهلي ورئيس نادي وفاق سطيف، وأول مرة أتعرف على القندوسي كان يوم 26 يناير عبر “زوم” وكان ماضي مع جعفر وعلي النيساني وأحمد يحيى.
وتابع: اتكلمت مع الوكلاء واللاعب وبعد ما وقعت العقد مع إدارة وفاق سطيف بعتله فويس يوم 28 يناير وقولتله خدت رقم تليفونك من رئيس وفاق سطيف وحصلت على توقيعك وأنت في معسكر منتخب الجزائر للمحليين.
وزاد أمير توفيق: فور وصولي الجزائر تفاجأت بوجود 3 وكلاء عن اللاعب يتفاوضون مع الزمالك لذلك تفاوضت معهم.
واختتم توفيق تصريحاته قائلا: كنا نتفاوض مع زين الدين بلعيد عن طريق وكيله الرئيسي وهو والده، وعلي كرماني لم يرسل أي مستند يفيد بأنه وكيل بلعيد وأنا معرفوش أصلًا ومتكلمش غير مع والده، وزين بلعيد كان فيه كلام معاه هو ووالده واللي وصّلني ليه هو أنيس بو جلبان في 2023.
