نجل فؤاد المهندس عن رفضه تقديم سيرة والده في عمل فني: مش هبهدل سيرته ومشواره
كشف محمد المهندس، نجل الراحل فؤاد المهندس، سبب عدم موافقته على تقديم السيرة الذاتية لـ والده في عمل فني، بجانب كشفه عما إذا كان بإمكانه تغيير شيء في حياة المهندس، ماذا سيكون.
وقال محمد فؤاد المهندس، في لقائه مع القاهرة 24: مفيش حاجة عايز أغيرها في حياة فؤاد المهندس، هو زي ما هو كده وأنا تشرفت أن أبويا فؤاد المهندس.
وعن سبب رفضه تقديم السيرة الذاتية لوالده في عمل فني، فعلق نجل فؤاد المهندس: مستحيل أوافق على تقديم السيرة الذاتية لـ فؤاد المهندس في عمل فني، ده شيء مرفوض تمامًا لأن حب الناس أهم حاجة، وحتى لو ابني المخرج عمر المهندس هو اللي هيخرج العمل مش هوافق.
وتابع نجل فؤاد المهندس: بعد ما أموت يعملوا اللي هما عايزينه، لكن في حياتي أنا وأحمد أخويا لأ، لأني مش عايز أبهدل سيرته ومشواره في عمل، كل السير الذاتية اللي اتعملت كانت دون المستوى ما عدا أم كلثوم وأسمهان، وغير كده وحش وقلل من قيمتهم الفنية، فأنا ليه أعمل له حاجة وحشة؟ حب الناس أهم حاجة في الدنيا.
نجل فؤاد المهندس: هحافظ على مقتنيات والدي لغاية ما أموت
وسبق وأكد نجل فؤاد المهندس، أنه سيعمل على حصر المقتنيات المتبقية لوالده الراحل خاصة بعد الحريق الأخير في المنزل، قائلًا: أكيد هحافظ على مقتنيات والدي ومش هفرط فيها أبدًا، والله لو عملوا إيه، أهم حاجة في حياتي فؤاد المهندس، وأهم حاجة حاجات فؤاد المهندس لأن دي اللي سابهالي وأنا هسيبها لـ عمر ابني وابني هيسيبها لـ ولاده، لو كلفتني إيه هحافظ عليها لغاية ما أموت.
