الدماطي يكشف كواليس وجوده في قائمة الخطيب بانتخابات الأهلي
كشف محمد الدماطي عضو مجلس إدارة النادي الأهلي تفاصيل وجوده في انتخابات النادي خلال الفترة الماضية ضمن قائمة محمود الخطيب.
تصريحات محمد الدماطي عضو مجلس إدارة النادي الأهلي
وقال الدماطي في تصريحات تليفزيونية: لما تبقا عضو مجلس إدارة فـ المسئولية بتبقا أكبر عليك من إن أنت تبقا مشجع.
وأضاف: رأيي بيكون في الغرف المغلقة لأن كرة القدم مُنفصلة عن أعضاء مجلس الإدارة ودا من أهم أسباب نجاح النادي الأهلي، مفيش عضو في مجلس الإدارة بيتكلم في ملف الكرة، ممكن في جلسة مع الكابتن محمود الخطيب إنما في اجتماعات مفيش عضو بيتكلم عن فريق الكورة.
وأشار محمد الدماطي خلال تصريحاته: في 2022 كتبت بوست كرأي عن حالة فريق الكرة وعمل مشكلة وقتها وكان غلط مني، ودا كان غلط علشان دي مش تقاليد النادي الأهلي، وبعترف إني كنت غلطان.
وأكد: الأهلي لما بيخسر الدنيا بتسود في وشي، وقابلت الخطيب في مرة وقولتله عدد من أسماء المدربين وبعدين كلمني وقالي تعرف توصل لحد منهم فقولتله لأ الصراحة، وبعدها اتقابلت مع خالد مرتجي، ومن هنا بدأت علاقتي مع الخطيب ومرتجي.
وأوضح محمد الدماطي: أبويا أهلاوي متعصب، وكان حلمي منذ الطفولة أن أكون في مجلس إدارة النادي الأهلي، وعمتي كانت أهلاوية جدًا واتوفيت ودايمًا كانت بتحب تشوفني على التليفزيون عشان كدة جيت.
وأردف خلال تصريحاته: بعد ما حصلت أحداث بورسعيد في 2012 بعدت خالص عن المشهد الرياضي، والجارحي كلمني في 2017 قالي اسمك موجود في قائمة الخطيب، وأنا أصلا مكنش عندي علاقات في النادي، ولما كملت 35 سنة كلمت الخطيب قولتله أنا فوق السن وبرفع الحرج عنك لأن فيه أسماء تقيلة نازلة غيري، لكن هو قالي لا خليك وكدة وكان يوم تاريخي بالنسبالي.
وأتم محمد الدماطي تصريحاته قائلًا: الخطيب عمره ما بيزعل مني والحمد لله علاقتي حلوة بالناس كلها وبحب الخطيب جدًا وهو بيعرف يحتوي أي حد وعنده كاريزما كدة بتخليه يعرف يحتوي أي حد والعلاقة بينا مميزة.
