أبرز تصريحات نهى عابدين مع منى الشاذلي: ثقتي في الناس صفر.. والشخصية الذكورية بالنسبالي مصدر إزعاج
حلت الفنانة نهى عابدين ضيفة على الإعلامية منى الشاذلي في برنامجها المذاع عبر قناة ON، وخلال وجودها تحدثت عن الأمور عن حياتها الشخصية وبدايتها الفنية وعلاقتها بـ نجلها.
وإليكم أبرز تصريحات نهى عابدين:
-دخلت التمثيل من خلال معهد فنون مسرحية ومكنش عندي خبرة ومعملتش أي حاجة قبل الدراسة وقدمت مسلسل ونوس وأنا في المعهد وكنت لسه مخلفة وابني كان عنده شهور.
- تزوجت خلال دراستي في معهد الفنون وخلفت ابني وقت تصوير مسلسل ونوس وطول الوقت كنت عايزة أعمل كل حاجة مع بعض وأدرس وأشتغل وكنت محملة نفسي زيادة.
-الناس قالوا إن شخصية ديحا في العتاولة هي روقة العصر بتاعت سنة 2024، الست اللي بتضحي ويمكن لو اتربيت تربيتهم أو تعرضت للمواقف اللي مروا بيها أبقى زيهم.
-الشخصية الذكورية في حياتي بعتبرها مصدر لوجع الدماغ وأنا علاقتي بـ ابني مش مجرد أم ولكن بسعى يكون نموذج لـ الراجل اللي أتمنى أقابله أو الراجل اللي يكون موجود في حياتي.
-أنا مش سهل حد يتعامل معايا لأني تركيبة خاصة ومريت بظروف كبيرة وفقد وتحديات وبعتبر كل اللي مريت بيه تركيبة.
-ثقتي في الناس صفر ومش بثق في حد، وأنا شخص بيتوتي مبحبش الدوشة.
-بركز إن مكررش نفسي وأما بعمل ضجة بيحصروني فبضطر أقعد فترة وأرجع أشتغل تاني حاجة مختلفة وبذاكر أبعاد أي شخصية كويس جدًا.
-مفيش بني آدم خير أو بني آدم طيب كل شخص في جواه حاجة ياتطلع الشر أو الخير.
-بحب دوري في مسلسل أشغال شقة جدًا.
نهى عابدين تتعاقد على فيلم الدشاش بطولة محمد سعد
وتعاقدت مؤخرًا الفنانة نهى عابدين على فيلم الفنان محمد سعد الجديد الذي يحمل اسم الدشاش، وهو من إخراج سامح عبد العزيز وعلم القاهرة 24 من مصادره، بانضمام الفنانة نهى عابدين لأبطال العمل، ومن المقرر انطلاق تصوير مشاهدهما خلال شهر أكتوبر المقبل، وتواصل الشركة المنتجة ترشيح والتعاقد مع باقي أبطال العمل.
