تامر حسني يفسّر سورة الكهف: فيها قصص عن عدم فهمك للقدر.. وياريت نعلم أولادنا قصص الأنبياء
فسر الفنان تامر حسني سورة الكهف لمتابعيه اليوم الجمعة، مشددًا على ضرورة وفهم تفسير الآيات، إذا أشار إلى أنها توضح كيف خالف القدر توقعات الإنسان.
ونشر تامر حسني عبر حسابه الرسمي بموقع التواصل الاجتماعي منشور نص به قائلًا: جمعة مباركة على حبايب قلبي بمناسبة الجمعة وسورة الكهف العظيمة كنت بقرأها من شوية بجد فيها قصة عظيمة بين سيدنا موسى وسيدنا الخضر عليهم السلام، أنا عن نفسي بحبها أوي ونفسي كل اللي مش عارفها يعرفها ويفهمها أنا عارف إني أقل من إني اتكلم في حاجة كبيرة كده.
وتابع: وأنا بقرأها قولت أبقى أناني أوي لو الجمال ده كله والفهم والمعاني الرائعة دي موصلتهاش لإخواتي وخصوصًا إننا في عصر أحداثه كتيرة وبنشوف قدام عينينا حاجات أكبر من إدراكنا حاجات تخلينا نسأل ليه حصلت بخلاف عظمة كل حرف في القرآن الكريم، وفي سورة الكهف كلها والسورة فيها قصة بتتكلم عن عدم فهمك وإدراكك لكل قدر بيحصل ليك بتبقى شايف إنه شر وإزاي ربنا عملهولك عشان في خير من وراه أكبر بكتير لمصلحتك ولولا اللي هو شر من وجهة نظرك إنه حصلك مكنتش هتعلى وتنجح أكتر.
وأردف: يعني لو حد دخل حياتك واتسببلك في أذى نفسي أو مادي لازم تثق إن ده حصل لمصلحتك بس طبعًا تصبر وتقول الحمد لله من ثقتك في إن ربنا مش بيريد للإنسان غير الخير حتى لو الإنسان شاف إن اللي حصله ده مش خير بيكون عشان عدم مقدرته على الإطلاع على الغيب، وعشان إتأذى بجد وعشان تعب بجد بيشوف إن ده شر بس تخيل لما توصل من الثقة المطلقة في ربنا وإن عمرك ما تحط ربنا في موضع اتهام بإنه مش بيحبك أو إن أقداره غير عادلة، لازم تفهم إنه فعلًا عمل كده لمصلحتك هتلاقي مصلحتك بتيجي أسرع والبلاء يترفع عشان رضيت وصبرت وقولت أنا واثق فيك يا رب سامحني إدراكي قليل وعلمي قليل إني أفهم كل حكمتك بس أنا واثق في عدلك وواثق إنك بتحبني وهقول الحمد لله من أعماق قلبي.
واختتم قائلًا: قول هصبر بمنتهى الرضى وساعتها اتفرج على حياتك وهي بتتغير للأجمل وهتشوف اليقين وهو بيجيلك إنك كنت صح وإن ربنا كان في ضهرك ساعتها بيحميك وبينصرك رغم ألمك.
