حسام حسن: صلاح يشاركني كل شيء داخل المعسكر.. وهو الوسيط مع اللاعبين
تحدث حسام حسن المدير الفني لـ منتخب مصر، عن فوز الفراعنة بهدفين دون رد، ضمن التصفيات المؤهلة لأمم إفريقيا المغرب 2025.
تصريحات محمد صلاح
وقال حسن في تصريحاته خلال المؤتمر الصحفي عقب المباراة: أقدم التحية للجماهير، وعدتكم من أول يوم نعمل لصالح منتخب مصر، وموريتانيا منتخب محترم، وفى الشوط الأول كنا كويسين رغم عدم التسجيل، ومحضر كل حاجة للمباراة.
وأضاف: عندي ثقة في اللاعبين، ولا بد من تلاحم الأجيال وده اللي بعمله، وسعيد بالمنتخب، محمد صلاح عمل سكور حلو، بتسوانا امبارح فاز فكان لازم الفوز أمام موريتانيا.
وأردف: لو مكسبتش برة مصر مش هخسر، ومحمد صلاح، تريزبجيه، رامي ربيعة، حمدي فتحي، الشناوي، محمد عبد المنعم، لاعبين مميزين.
وواصل: محمد صلاح لاعب ذكي، وأنا وهو كنا لسه منعرفش بعض والناس في الأول حطوا بيننا ديناميت، ومحمد صلاح أخويا الصغير وسنه كمان قريب من أولادي.
وتابع: عمري ما أحط الجوهري جنب حسام حسن، مينفعش نقارن بين مدرب ولاعب، صلاح مستريح معايا نفسيا، مشوفتش محمد صلاح بيتكلم مع اللاعبين مع أي مدرب زي دلوقتي، وأنا معنديش أي مشاكل خالص لو ليفربول أو فرانكفورت أو أي نادي عاوز يحافظ على اللاعب بتاعه، معنديش مشاكل أي لاعب يخرج من المعسكر، أنا بخاف على اللاعيبة زي الأندية.
واستطرد: محمد صلاح يشاركني أنا وإبراهيم كل شيء داخل المعسكر وهو الوسيط بيننا وبين اللاعبين، وكنت قاري الخصم كويس أوي، بنحاول نستفيد من كل اللاعبين، وعمر مرموش إن شاء الله يكون مميز الفترة اللي جاية، مردفا: هناك دعم جماهيري للمنتخب، ولكن لازم منتخب مصر يكون له مساحة كبيرة.
