استغليت شغلي وسرقت الأجهزة.. ننشر أقوال المتهم الأول في قضية سرقة 1100 تابلت من التربية والتعليم| انفراد
ينفرد القاهرة 24 بنشر نص التحقيقات في قضية سرقة 1100 تابلت من مقر وزارة التربية والتعليم، بمدينة مبارك التعليمية، بمدينة السادس من أكتوبر، والتي كشفت عن تورط أصحاب محلات كوكو آند إس، وكذلك أصحاب فاترينات موبايلات بشارع عبد العزيز، وطالب بالجامعة، وعامل البوفيه العقل المدبر لواقعة السرقة.
تحقيقات قضية سرقة 1100 تابلت من وزارة التربية والتعليم
حصل القاهرة 24 على نص التحقيقات في الواقعة، وبثمول المتهم أمام جهات التحقيقات، قال: اسمي محمود. م. ا 22 سنة مقيم بميت عقبة العجوزة، وبسؤاله عن أقواله فيما هو منسوب إليه من أنه متهم وآخر بسرقة أجهزة الحواسيب اللوحية (تابلت) المبنية بالأوراق وصفًا وقيمة والمملوكة لـ وزارة التربية والتعليم؟ أقرب بارتكابه الواقعة، قائلًا: حصل وأنا غلطان.
س: ما هي تفصيلات إقرارك؟
ج: اللي حصل إن أنا شغال عامل بوفية ونظافة تبع شكة إيجي كول، بس أنا شغال من غير عقد، وبعدين روحت اشتغلت في الإدارة بتاعت المدينة التعليمية كعامل نظافة وأنا هناك اشتغلت عامل بوفية كمان، والأول اشتغلت في الإدارة نفسها، وبعد کده نزلونا المخزن والفترة اللي أنا اشتغلت فيها في المخزن بوفية شوفت أن المخازن فيها غرفة فيها أجهزة تابلت.
وأضاف المتهم: أنا فضلت شغال هناك فترة الأول وبعدين جه في بالي إني أخد جهازين من اللي موجودين في الأوضة وأبيعهم، وفعلا خدت جهازين ونزلت بيهم على وسط البلد وهناك قابلت واحد اسمه يوسف عرفته بالصدفة وعرضت عليه الجهازين اللي معايا وقالي أنه هيشتري الواحد بـ 1700 جنيه، وبعتهم له فعلًا، ولقيته بيقولي لو في أي حاجة تانية عايز تبيعها قولي.
وأكمل المتهم: وبعدها بكام يوم خدت 112 جهاز تابلت تانيين وكنت باخدهم على مراحل عشان محدش ياخد باله، يعني كنت بحط كام كرتونة في شنطة هاند باج مثلا وأطلع بيها، والأجهزة التانية اللي خدتها دي بيعتها لـ يوسف، وخدهم مني بنفس السعر 1700 جنيه للجهاز الواحد، وبعدها أتعرفت على واحد اسمه رفعت وشهرته بندق وعرضت عليه إني ممكن أجبله أجهزة تابلت لو عايز، وخد 91 كرتونة، كل كرتونة فيها 10 أجهزة، واداني مقابلهم مبلغ 1250000 جنيه- وكان فيه 12 جهاز تانيين أنا خدتهم وحطيتهم في كيس وشيلتهم عند واحد صاحبي مقبوض عليه معايا اسمه حسام وحطيتهم عند واحد صاحبي في مكتب سياحة.
وأردف المتهم: وهو ميعرفش حاجة بصراحة عن الكيس ده أو الأجهزة اللي فيه وهو اتظلم معايا بس عشان أنا كنت شايل معاه الحاجة مع أنه ميعرفش الحاجة دي جايه منين، ومن 5 أيام كنت موجود في بيتي في حدائق أكتوبر ولقيت الشرطة عندي وبتخبط على الباب ففتحتلهم الباب راحوا فتشوا البيت كله وخدوا موبايلاتي والفلوس اللي كانت في البيت حوالي 25 ألف وخدوني أنا ومراتي على القسم، وهناك فضلوا يحققوا معايا ويسألوني عن الأجهزة وأنا ساعدتهم بصراحة وقولتلهم على كل حاجة.
وزاد المتهم: وكمان دليتهم على الأجهزة والأماكن اللي بعتها فيها والفلوس اللي كانت معايا كلها اديتها لهم وده كل اللي حصل معايا.
وقررت المحكمة تأجيل جلسة محاكمة المتهمين بسرقة 1100 تابلت من مقر وزارة التربية والتعليم بمدينة مبارك بالسادس من أكتوبر، لجلسة 21 أكتوبر للاطلاع.
