جدو لـ أحمد سليمان: الزمالك عليه علامات استفهام.. إزاي بتتكلموا على رمضان صبحي؟
رد محمد ناجي جدو المدرب العام لفريق بيراميدز، على تصريحات أحمد سليمان عضو مجلس إدارة نادي الزمالك، والتي أشار فيها إلى تعنت إدارة السماوي في بيع لاعبيها إلى القلعة البيضاء.
رد قوي من جدو على تصريحات أحمد سليمان
كتب جدو عبر حسابه الشخصي على موقع إكس: الكابتن أحمد سليمان طلع امبارح وهاجم بيراميدز وأندية الشركات وقال علامات استفهام على بيراميدز، عشان مش بيدوهم لاعيبة وإنهم بيشتروا لاعيبة وأنهم بيصرفوا كتير، وبيدخلهم فلوس قليلة ومش بيسيبوا لاعيبة تحترف.
وتابع: أولًا بيراميدز أداهم عمر جابر ودونجا وعبدالله السعيد وهما دلوقتي أحسن لاعيبة في الزمالك، وهل لو بيراميدز كلم الزمالك إنهم عايزين زيزو مثلا الزمالك هيوافق؟، ومسبيبتش زيزو يحترف ليه؟
وواصل جدو تصريحاته: ثانيًا طبيعي إن بيراميدز يشتري لاعيبه ويقوي القائمة زي كل الفرق، ثالثا ممكن تقولنا يا كابتن أحمد، الزمالك بيصرف كام؟ وبيدخله كام؟، وهل بيكسبوا فلوس من الكرة أكيد لأ.
واستطرد: الزمالك دفع أكتر من مليار جنيه غرامات بس، فممكن تقولنا الكرة في الزمالك بتكسب كام، رابعًا من أول المجلس نجح في الانتخابات وكل لقاء تليفزيوني من أول الرئيس لأصغر عضو بيتكلم عن رمضان، وعايزين رمضان صبحي مع إنه متعاقد مع النادي لمده 3 سنوات.
واختتم جدو تصريحاته: دي حاجة عمري ما شوفتها في أي حتة في العالم، لا في مصر ولا بره مصر إن مسئولين نادي بيتكلموا عن لاعب في نادي تاني، وعقده سارٍ لمدة 3 سنوات، بصراحة إنتوا اللي عليكم علامات استفهام.
أحمد سليمان: بيراميدز عليه علامات استفهام
وكان أحمد سليمان وجه انتقادات لمسؤولي بيراميدز، حيث قال في تصريحات تلبفزيونية: بيراميدز بالنسبة لي علامة استفهام كبيرة في الكرة المصرية، وبيصرفوا مبالغ كبيرة، وأول ما أرفع سماعة التليفون عليهم بيقولوا لا.
وأضاف: وكلامي كمان لـ أندية الشركات بشكل عام، واتعاقدت مع لاعبين من الخارج تحت السن وفوق السن بـ ربع ثمن اللاعيبة المصرية، وأندية الشركات بتصرف ملايين ومابتكسبش حاجة، لازم الأندية الشعبية ترجع.
