أحد المتهمين بسرقة 1100 تابلت: اشتريت 900 جهاز واتوسطت في بيع الباقي
ينفرد القاهرة 24 بنشر التحقيقات في قضية سرقة 1100 تابلت من مقر وزارة التربية والتعليم، بمدينة مبارك التعليمية، بمدينة السادس من أكتوبر، والتي كشفت عن تورط أصحاب محلات كوكو آند إس، وكذلك أصحاب فاترينات موبايلات بشارع عبد العزيز، وطالب بالجامعة، وعامل البوفيه العقل المدبر لواقعة السرقة.
تحقيقات قضية سرقة تابلت وزارة التربية والتعليم
وجاءت أقوال أحد المتهمين، وهو رفعت. ص. ف، عمره 44 سنة، مقيم بالدرب الأحمر ويعمل صاحب حانوت هواتف بشارع عبد العزيز أمام رجال التحقيق، وبسؤاله حول ما هي أقواله فيما هو منسوب إليه من أنه متهم بإخفاء منقولات أجهزة الحواسيب اللوحية، المبينة بالأوراق، وصفًا وقيمة والمملوكة لوزارة التربية والتعليم حال كونها متحصلة عن واقعات سرقة، مع علمه بذلك على النحو المبين بالأوراق؟ أنكر ارتكابه تلك الواقعة.
س: ما الذي حدث إذا وما هي ظروف ضبطك وعرضك علينا؟
ج: اللي حصل أن أنا شغال بائع على فترينة موبايلات في شارع عبد العزيز، وبعدين من فترة حوالي شهرين أو كتر، دخل عليَّ شاب شايل شنطة اللي هو محمود، شغال عامل البوفيه، وقالي إن هو معاه جهازين تابلت ساسونج، فقولتله هات أبص عليهم أشوفهم في منظومة الوزارة بتاعت التعليم، ولا بره المنظومة؛ ففتحت الأجهزة ولقيت أن الأجهزة مش عليها المنظومة بتاعت وزارة التعليم.
وأكمل المتهم: فلما لقيت كده قولتله خلاص تمام هاشتري منك وروحت خدت صورة بطاقته وصورته على سيريال الأجهزة وبعدين قولتله الأجهزة دي مصدرها إيه وفواتيرها فين، راح قالي أن هو شغال في جهة تبع وزارة التعليم وأن في شخص واخد الحجات دي إفراج جمركي، وعنده كميات منها وأن هو خدها منه، وأنا وصلني منه 900 جهاز، وأنا عشان على قد حالي فمقدرش اشتري بصراحه بس كنت وسيط واديتهم لواحد اسمه أحمد جالاكسي، معاه محل تليفونات، وخدت نسبة بس مش أكتر.
وأردف المتهم في أقواله أمام جهات التحقيقات، انما أنا مشتريتش حاجه، وبعدين لما أنا لقيت منشور من وزارة التعليم أن في أجهزة مسروقة وعليها مشاكل روحت للقسم من نفسي وبعدين أديتهم صور البطاقة بتاعت محمود اللي كان بيجيب الأجهزة عشان أثبتلهم إني مشترتش حاجه وحكيلتهم كل حاجه.
س: متى وأين حدث ذلك؟
ج: أنا اتقبض عليا يوم 8/9/2024، في قسم أول أكتوبر، الجيزة.
س: ومن كان برفقتك آنذاك؟
ج: كنت لوحدي.
س: وما هي طبيعة العلاقة فيما بينك وكل من المتهمين هاني. ك، ومحمود. م، واحمد. م؟
ج: أنا معرفش أي حد من دول واللهِ.
س: وما هي طبيعة العلاقة فيما بينك وبين كل من المتهمين محمود. م، وحسام الدين. م، ومحمد. ح، وحازم. ع، واحمد. ع، ومحمد. س؟
ج: أنا معرفش أي حد من دول غير محمود، ومحمود مفيش علاقه بيني وبينه، غير لما جالي عشان يديني أجهزة التابلت، ولما لقيت الأجهزة بره المنظومة بتاعت الوزارة ولقيته بيقولي أنه جايبها جهة تبع الوزارة، أتوسطت لواحد اسمه أحمد جالاكسي أنه يشتريهم وخدت عمله بس، وأنا مقدرش اشتري أصلا أي حاجة: لأن أنا بياع مش صاحب محل.
س: وما مدى علمك كون تلك الأجهزة متحصلة عن واقعات سرقة؟
ج: واللهِ ما كنت أعرف، لأن الجهاز كان متبرشم، وأنا فتحت واحد فيهم لقيته بره النظومة بتاعت الوزارة، وأنا اللي رايح القسم برجلي.
س: ما قولك فيما قرره المدعو أحمد. ح إذًا بالمحضر رقم 10267 لسنة 2024 جنح أول أكتوبر، المؤرخ في 5/9/2024، والثابت به تلوناه عليه؟
ج: أنا والله ما عرفت الكلام ده غير لما شوفت المنشور بتاع الوزارة، وساعتها أنا اللي روحت القسم بنفسي، وأنا فعلا مشتريتش أي حاجه أنا توسطت لواحد تاني إنه يشتري ولو أعرف أن الحاجات مسروقة مكنتش عملت كده.
س: وما قولك فيما أتبعه سالف الذكر بشهادته لدى سؤاله بتحقيقات النيابة العامة الثابت بها تلوناها عليه تفصيلًا؟
ج: أنا معرفش أي حاجة عن الموضوع ده.
س: ومن هو القائم على ضبطك تحديدًا؟
ج: أنا روحت للقسم بنفسي.
س: هل من ثمة حديث دار فيما بينك وبين سالف الذكر؟
ج: هو سألني على الأجهزة وإيه اللي حصل، وقولتله نفس اللي حكيته دلوقتي.
س: وما الذي أسفر عنه ذلك التفتيش؟
ج: مكنش معايا أي حاجه
س: ما قولك في المضبوطات أجهزة الحواسيب اللوحية والمباغ المالية السالف فضها في مواجهتك وعرضها عليك على النحو الثابت بصدر التحقيقات؟
ج: أنا مشترتش الأجهزة دي والله أنا اتوسطت لواحد انه يشتريها، ومكنتش أعرف إنها مسروقة والفلوس الـ 600 ألف جنيه، مكسبي وأنا جبت الفلوس من البيت.
س: أنت متهم بإخفاء منقولات أجهزة الحواسيب اللوحية المبينة بالأوراق وصفًا وقيمة والمملوكة لوزارة التربية والتعليم حال كونها متحصلة عن واقعات سرقة مع علمك بذلك على النحو المبين بالأوراق؟
ج: محصلش.
