أحمد حاتم يكشف كواليس أزمة فيلم الملحد.. ويؤكد: أوقات فراغ وش السعد وابن حلال كان نقلة
تحدث الفنان أحمد حاتم، عن خوضه تجربة فيلم الملحد، كما علق على الهجوم الذي لاحق العمل والأزمات ومنع عرضه بعدما تحدد موعد طرحه بالسينمات، بجانب حديث عن نجاح مسلسله الأخير عمر أفندي، وفيلم عاشق، وإمكانية زواجه مرة أخرى، وذلك في لقائه مع الإعلامي معتز الدمرداش، في برنامج ضيفي.
أبرز تصريحات أحمد حاتم مع معتز الدمرداش
- مش ندمان على فيلم الملحد، وكل الجدل اللي عليه من عنوانه وكان متوقع أن هيحصل الجدل ده، ولكن الأكيد أني مش هعمل حاجة أخجل منها، ممكن نُخطئ أكيد.
- فيلم الملحد عمل حساس جدًا وفي موضوع أنا شايف أنه مهم نتكلم عنه مش علشان نروج له، أكيد أنا مبتكلمش عن الإلحاد علشان أروج له.
- وجهة نظري الناس هتشوفها لما تتفرج على الفيلم، وفي ناس تانية هتقول طيب انت اتكلمت عن الإلحاد ليه؟، ده عادي ووارد ولكن أنا قناعتي ونيتي العكس.
- معنديش معلومة مؤكدة إذا كان هيتم رفع الحظر عن فيلم الملحد ولا لاء، ولكن أنا متوقع إن أكيد هيجي وقت وهيتشاف، لأن بقى في وسائل كتير لعرض العمل الفني، ممكن يتشاف في السينما وممكن على المنصات، ولكن هيتشاف إزاي وإمتى معرفش.
- ما أتمناه أن وقت ما يتشاف الناس تشوف فيه حاجة كويسة زي ما أنا شفت فيه حاجة كويسة.
- ماندو العدل عرض عليا فيلم الملحد ووقتها كان لسه عامل مع إبراهيم عيسى فيلم صاحب المقام وعجبني جدًا، وأنا خدت رأي ناس في تناول حاجات معينة في الفيلم، ونهاية الفيلم مؤثرة بالنسبة ليا.
- عمر أفندي كان فيلم واشتغلنا عليه كتير جدًا وقعدنا نعيد كتابته، حاولنا ننجح أننا نعمله ولكن لسبب ما متوفقناش ومعرفناش نعمله، وسيبته من كتر المجهود اللي عملته فيه ولسه واقف ومحدش كان متحمس له.
- عدى الوقت وجالي المخرج عبد الرحمن أبو غزالة وقالي انت عندك فيلم ولكن هنصوره كمسلسل، ولكن أنا من كتر الوقت والمجهود اللي بذلته فيه كنت حاسس إني هعتذر في البداية، ولكن هو رجعلي الحماس تاني للعمل.
- فيلم أوقات فراغ كان وش السعد عليا وهو اللي قدمني للسينما، وأنا محظوظ بالفيلم ده وبالناس اللي اتعلمت منهم في الفيلم ده.
- أكتر حد خدت فرص معاه كانت هنا الزاهد وفهمنا بعض من أول فيلم، وبقينا فاهمين دماغ بعض أوي.
- فيلم عاشق نزل مكان فيلم الملحد، لأنه كان جاهز.
- معرفش الناس هتستقبل فيلم الملحد إزاي على مستوى الصناعة في السينما.
- محمود عبد العزيز مثلي الأعلى، وكان عنده تنوع كبير جدًا وتقمصه وخفة دمه، الله يرحمه كان من أكتر التجارب الفنية اللي مأثرة فيا.
- طبعًا فكرة الجواز مرة تانية موجودة، والمهم أن شريكة حياتي تكون بنت ناس ومريحة وسالكة وواضحة وتحتويني، وأنا مبفضلش جواز الصالونات.
- مسلسل ابن حلال بطولة محمد رمضان كان نقلة في حياتي.
- فيلم الهرم الرابع كان محطة حقيقية في حياتي.
