إنجي المقدم تكشف موقفًا خلال استخدامها مكنة ATM لسحب الأموال: الست لزقت فيا.. وعندي ذهول من البجاحة والوقاحة
كشفت الفنانة إنجي المقدم، موقفًا تعرضت له من سيدة أثناء استخدامها مكنة ATM لسحب الأموال، مستنكرة الموقف بسبب تعدي البعض على الخصوصيات الشخصية.
وكتبت إنجي المقدم، منشورًا عبر حسابها الشخصي بموقع التواصل الاجتماعي فيسبوك، حيث قال: روحت النهاردة اسحب فلوس من ماكينة الـ ATM.. البنك مشكور عامل أوضة متر في متر كده حاطط فيها مكانتين ومقفولة بباب للخصوصية وكده يعني !!.. دخلت الأوضة لقيت راجل محترم بيسحب من الماكينة اللي في وش الباب عديت من وراه بالورب ووقفت عند الماكينة اللي جنبه علشان اسحب، وكل واحد في حاله وفي صمت تام مركز في اللي بيعمله !.
وأضافت إنجي المقدم: إذ بي أفاجأ براجل بيرزّع في الباب وداخل هجم على الأوضة لدرجة إن أنا والراجل المسكين اللي جنبي اتفزعنا، قلنا معلش هيلاقي الماكنتين مشغولين هياخد بعضه ويخرج !!! أبدا ده دخل وقفل الباب وراه وفضل واقف جنب الراجل المسكين من الناحية التانية فى الأوضة المتر في متر وماتحركش لدرجة إن مناخيره كانت لازقة في خد الراجل والله حرفيا، أنا استغربت جدا بس لقيت الراجل المسكين ساكت قلت وأنا مالي بقى هو حر!.
وأضافت إنجي المقدم: مفيش ثواني بعدها دخلت واحدة ست بنفس الطريقة الهجومية بتاعت الراجل الأولاني اللي تحسسك إنها كبسة مباحث!! وقامت حشرة نفسها وجت وقفت ورايا لدرجة أن أنا والله العظيم كنت حاسة بنفسها فى قفايا عاوزة أقولكم إني ساعتها اترعبت، قلت لا دول أكيد عصابة ومتفقين وداخلين يثبتونا أنا والراجل المسكين ويقشطنوا، أصل مش معقول يعني هما الاتنين يكون معندهمش أي إحساس ولا دم للدرجة دي مش طبيعي يعني أكيد دول هيقلبونا، وبعدين افتكرت أن فيه كاميرات جوة الأوضة، فاخدتني الشجاعة وادورتلهم بقى في مشهد عبثى جدا بين أربعة أفراد ميعرفوش بعض في أوضه متر في متر.
واختتمت إنجي حديثها: بدأت أدي محاضرة في الأخلاق عن احترام الخصوصية وعن أن المفروض تستنوا برا لحد ما دوركم ييجي وعن احترام المسافة الشخصية بين البشر وعن الـ personal space وكلام كتير غالبا محدش فيهم فهمه، بس حسوا من نبرة صوتي إن أنا متضايقة شوية فخرجوا على مضض واستياء وهما بيبرطموا، بصيت للراجل المسكين اللي جمبي وأنا حقيقي عندي ذهول من البجاحة والوقاحة وبقوله (هو ده بجد!!!!!).. لقيته يا حرام بيضرب كف على كف زيي بالظبط وواقع على روحه من الضحك من عبثيه المشهد.
