محمود حميدة: خلعت أسناني في فيلم جنة الشياطين.. وكانوا بيلزقوا الدقن بالكولا وبيشيلوها بالجاز والبنزين
تحدث الفنان محمود حميدة عن كواليس تصوير فيلم جنة الشياطين الذي عرض عام 1999، وأشار إلى أن كل فنان له طريقة عمله الخاصة وله مرجعية مختلفة مثل العمل مع جورج أبيض والريحاني، أو يوسف وهبي، ولكل منهما تقاليد مهمة مختلفة تتعلمها الأجيال.
قال الفنان محمود حميدة في الندوة المقامة حاليًا في مهرجان الجونة السينمائي: في فيلم جنة الشياطين كل واحد كان له طريقة يشتغل بيها، وكل واحد فينا اتعلم الشغلانة دي بطريقته الشخصية، ودي اسمها تقاليد للمهنة، وفي مصطلح شهير في المهنة اسمه التقمص لدرجة أن في ممثلين بيتقمصوا ومبيرجعوش من الشخصية.
محمود حميدة: كنت بقعد على قهوة الكومبارسات
أردف حميدة: الفيلم كله كان بلبس واحد ومكنش عندي لبيس، كنت بروح شايل الشنطة وفيها اللبس وبقعد على القهوة مع الكومبارسات، علشان تيجي عربية تاخدنا تودينا اللوكيشن، زي عُمال التراحيل بالضبط، وقعدت أصوره 5 أسابيع ويومين، ده الفيلم الوحيد اللي أنا عارف أيام تصويره يوم يوم، لأنه كان شقاء حقيقي.
وأضاف: في الأعمال الفنية بيلزقوا الذقن بحاجة اسمها الكولا، والكولا دي بيلزقوا بيها الجزم، وبيشيلوها بالجاز والبنزين، وأنا خلعت أسناني حقيقي في فيلم جنة الشياطين، والشخصية كانت ميتة وده شيء بالنسبالي يشبه الانتحار ومكنش في ماكيير يعمل ده ويشيل الأسنان، ورحت للدكتور علشان يبرد أسناني خالص ونقدر نركب الأسنان الذهب بتاعة الشخصية.
فيلم جنة الشياطين
يذكر أن فيلم جنة الشياطين، دارت أحداثه حول طبل، وهو شخص قرر ترك أسرته الغنية وحياته المرفهة، ليعيش حياة بوهيمية تمامًا وسط عدد من المهمشين، حتى يموت، وبينما تسعى ابنته حينها لمنحه جنازة لائقة بالعائلة، فإن أصدقائه يسرقون الجثة تمهيدًا لوداعه بطريقتهم الخاصة.
فيلم جنة الشياطين بطولة: محمود حميدة، لبلبة، كارولين خليل، عمرو واكد، والعمل من تأليف مصطفى ذكري، وإخراج أسامة فوزي.
