محمد فراج: مستحيل الذكاء الاصطناعي يعوض غياب الممثل.. وترشيح أفلامي للأوسكار مش هيأثر على اختياري للأدوار
تحدث الفنان محمد فراج، عن استخدام الذكاء الاصطناعي في صناعة السينما، بجانب تعليقه على ترشح فيلميه: فوي فوي فوي، والرحلة 404 لجائزة الأوسكار.
وقال محمد فراج، في لقائه مع القاهرة 24، على هامش حضوره فعاليات مسابقة تقديم الأفكار بـ سينما تك، خلال فعاليات مهرجان الجونة السينمائي: موضوع أن الذكاء الاصطناعي يحل محل الممثل مش بالسذاجة دي، ومستحيل الذكاء الاصطناعي يعوض غياب الممثل، آه التكنولوجيا زي ما ليها مميزات ولكن ليها أضرار وعيوب، وإحنا بنختار الحلو منها علشان نفيد نفسنا وصناعة السينما وبلدنا، وده اللي شغالين عليه في مهرجان الجونة، يعني هي كاميرا هتبقى بتصور ذكاء اصطناعي؟ فين الحقيقية للموضوع؟
ترشيح فيلمين من أعمالي للأوسكار لن يؤثر على اختياري للأدوار
أما عن كيفية اختيار أدواره بعدما ترشح عملين له لجائزة الأوسكار، فعلق محمد فراج، قائلًا: ترشح فيلمين من أفلامي لجائزة الأوسكار مش هيأثر على اختياري للأدوار، لأن أنا اختياري للأدوار كده من قبل ما الأفلام تترشح وهتفضل كده، ده منهجي ومبدأي، ودي طريقة شغلي وأنا مولود كده، ومتربي في المسرح كده، ومن وأنا عندي 15 سنة بشتغل في فرق حرة وثقافة جماهيرية وبمثل في الشارع.
وأردف محمد فراج: أنا دايمًا بحب أني أعمل حاجة كويسة ومفيدة واختار الدور اللي عاجبني أوي، ولكن مع الوقت البني آدم بياخد الحلو ويرمي الوحش علشان طريقة تفكيره تبقى ناضجة.
