قبل أولى جلسات محاكمته.. الاعترافات الكاملة للمطرب سعد الصغير في قضية المخدرات
تنظر محكمة جنايات شمال القاهرة المنعقدة بالعباسية بعد قليل، أولى جلسات محاكمة المطرب سعد الصغير في اتهامه بإحراز جوهَرَي الحشيش والترامادول المخدريْن؛ بقصد التعاطي وذلك خلال عودته من إحدى الحفلات بالولايات المتحدة.
الاعترافات الكاملة للمطرب سعد الصغير في قضية المخدرات
وبمثول المطرب سعد الصغير أمام جهات التحقيقات، جاءت اعترافاته على خلفية اتهامه بحيازة المواد المخدرة، كالآتي:
اللي حصل إن أنا من حوالي 4 أيام سافرت أمريكا كنت رايح أشتغل وأعمل حفلتين للي منظمهم، وهو اللي طلبني في أمريكا ونظملي الحفلتين وبعد ما خلصت أداني هدية مجموعة من الفيب - سجائر إلكترونية - وقال فرقهم على الفرقة بتاعتك عشان هو عارف إني مش بشرب سجاير، وأنا كنت عارف إنها سجائر عادية فأخدتهم وركبت الطائرة من أمريكا وكنت راجع على مصر وفيه ترانزيت في الدوحة في قطر، وكانت معايا شنطة واحدة فيها لبسي منهم بدلتين، وفيهم الكيس الأسود اللي جواه سجاير الفيب - السجائر الإلكترونية- اللي إدهالي، ووصلت مطار القاهرة قبل الفجر.
وأضاف سعد الصغير في اعترافاته أمام جهات التحقيق: لقيت فرد جمرك بيسألني معاك حاجة قلت له مش معايا غير شوية سجائر فيب، وقالي هات الشنطة الفيب دي هتتجمرك وخد الشنطة وفتحها ولقى في الكيس حوالي 19 جهاز سيجارة فيب، وقالي إن في 9 منهم ريحيتهم مش حلوة، قلت له يعني إيه قالي يعني كويسين؟ قلت له طب اتأكد عشان كلهم زي بعض، وقالي لا هم الـ 9 دول مش كويسين، وعمل حضر ورجعلي باقي السجائر الفيب والشنطة وخد الـ 9 اللي بيقول عليهم، وده كل اللي حصل.
وشرع رجال التحقيق في سؤال سعد الصغير عن كيفية حصوله على السجائر الإلكترونية المخدرة، وكيفية ضبطه بمطار القاهرة، وتفاصيل رحلته إلى أمريكا والعودة منها، وجاءت كالآتي:
س: متي وأين حدث ذلك؟
ج: الكلام ده حصل قبل الفجر النهاردة 10 - 9 - 2024 حوالي الساعة 1:30 صباحًا في مطار القاهرة صالة رقم 3 وصول دولي.
س: وما سبب ومناسبة وجودك بالمكان والزمان بالبيان؟
ج: أنا كنت راجع من السفر من أمريكا
س: وما تفصيلات الرحلة التي حضرت على متنها البلاد؟
ج: هي رحلة الطيران القطري، مش فاكر رقمها، بس أنا ركبت من أمريكا أول أمبارح 8/9/2024 وكان فيه ترانزيت في الدوحة، وصلت امبارح 11 مساء في الدوحة، وقعدت هناك كام ساعة وجيت على مصر.
س: وما الغرض من تلك الرحلة لدولة الولايات المتحدة الأمريكية؟
ج: أنا كنت في ولاية تكساس كان عندي حفلتين وخلصتهم ورجعت.
س: وما مدة إقامتك بتلك الدولة؟
ج: أربعة أيام بس ورجعت.
س: وما طبيعة وصف الحقائب حيازتك؟
ج: أنا كان معايا شنطة سفر صغيرة لونها روز كنت بجرها وبمشي بيها على الطائرة.
س: وما محتوى تلك الحقيبة؟
ج: كان فيها لبسي وكان فيها كيس بلاستيك أسمر في سجائر الفيب -سجائر إلكترونية- اللي منظم الحفلة ادهالي هدية.
س: صف لنا تلك السجائر الإلكترونية حيازتك؟
ج: هي عبارة عن حوالي 19 جهاز فيب بنكهات تفاح وعنب وحاجات تانية.
س: ومن أين تحصلت على تلك السجائر الإلكترونية؟
ج: من واحد اسمه راغب، وهو منظم الحفلتين اللي كانوا في أمريكا، وهو أمريكي من أصل مصري وعايش في أمريكا.
س: ما محتوى تلك الأجهزة للسجائر الإلكترونية؟
ج: هي جواها فيب بنكهات وروائح مختلفة عنب وتفاح وحاجات كده، وأنا مسألتوش ده عبارة عن إيه لأني كده كده مش بشرب سجاير وكنت فاكرها سجاير عادية.
س: صف لنا مكان وضعك لتلك الأجهزة للسجائر الإلكترونية بحقيبتك؟
ج: هم كانوا مع لبسي في الشنطة لأنها أصلا شنطة مش كبيرة واتفتشت وأنا مسافر من أمريكا، واتفتشت وأنا في الدوحة واتفتشت لما جيت مصر.
س: وما قصدك من إحراز تلك الأجهزة للسجائر الإلكترونية إذًا؟
ج: كنت فاكرها سجائر عادية فيب، وكنت هديهم للفرقة بتاعتي هنا على سبيل الهدية.
س: وكيف تم ضبطك؟
ج: أول ما وصلت فتشوا الشنطة بتاعتي وخدوا تسعة من سجائر الفيب وقالولي التسعة دول ريحتهم مش كويسة وعملولي محضر بيهم.
س: وما مضمون الحوار الذي دار بينك وبين القائمين بضبطك؟
ج: أنا أول ما دخلت على فرد الجمرك لقيته بيسألني إنت معاك حاجة؟ وقلت له معايا سجاير فيب، لقيته قالي دول هيتجمركوا، وفعلا خد الشنطة وفتشوا ولقو فيها الفيب ده، وقلت لهم دي سجائر فيب عادية واخدها من واحد في أمريكا، لقيت واحد من الجمرك مسك تسعة سجائر فيب وقالي دول ريحتهم مش حلوة، قلت له هم كلهم فيب زي بعض، قالي لا التسعة دول ريحتهم مش كويسة.
س: وما سبب قيام سالفي الذكر بضبطك إذًا؟
ج: عشان هم بيقولوا إن فيه تسعة سجائر من الفيب ريحتهم مش كويسة.
س: صف لنا المضبوطات التي عثر عليها بحقائبك تحديدًا؟
ج: أنا كان معايا بالضبط تسعة سجائر إلكترونية اللي اداهم لي راغب هدية للفرقة بتاعتي، وبتاع الجمرك شاف فيه تسعة منهم قالي إن ريحتهم مش كويسة، وهم شكلهم زي الباقي عادي، ألوان مختلفة وأشكال مختلفة وجواهم سائل فيب عادي.
س: وملك من تلك المضبوطات؟
ج: هم بتوع واحد اسمه راغب وهو اداهم لي هدية.
س: وما سبب ضبطها بحوزتك بميناء القاهرة الجوي آنذاك إذًا؟
ج: أنا كنت واخدهم أفرقهم على الفرقة بتاعتي عشان فاكرهم سجائر فيب عادية.
وبإجراء تحليل من قبل مصلحة الطب الشرعي، كشف تقرير الإدارة المركزية للمعامل الكيميائية، أولًا بشأن نتيجة فحص عينتي البول ولدم للمتهم سعد الصغير، وتبين أنه مثبت به ببند الفحص والنتيجة أن عينة تحتوي على أحد نواتج أبيض الحشيش المدرج بالجدول الأول من جداول قانون المخدرات، ومخدر الترامادول وأحد نواتج الترامادول المدرج بالجدول الأول من جداول قانون المخدرات.
وأما عن التقرير الخاص بالمضبوطات، والثابت به ببند الفحص والنتيجة أن المضبوطات عبارة عن 9 أجهزة -سجائر الكترونية- منهم 3 بيضاء اللون و2 لبني اللون و2 خضراء اللون وواحد زهري اللون وواحد ذهبي اللون جميعا سائل زيتي اللون.
وأكمل تقرير الطب الشرعي في قضية المطرب الشعبي سعد الصغير، أن المضبوطات وزنت جميع السجائر بما تحوي 224 جراما و80 سنتيجراما، ثبت أن السائل بالسجائر يحتوي على المادة الفعالة للحشيش المدرجة بالجدول الأول من جداول قانون المخدرات.
من جانبها أمرت النيابة العامة بإحالة المتهم سعد الصغير محبوسًا إلى محكمة الجنايات المختصة؛ لمعاقبته على ما أُسند إليه من ارتكابه جناية إحراز جوهَرَي الحشيش والترامادول المخدريْن؛ بقصد التعاطي في غير الأحوال المصرح بها قانونًا.
