تامر هجرس عن الراحل مصطفى فهمي: من رحمة ربنا إنه متألمش كتير.. ولحد آخر أيامه كان بيلعب تنس
أعرب الفنان تامر هجرس، عن حزنه الشديد بسبب فقدان صديقه الفنان مصطفى فهمي، بجانب الحديث عن حالة الفنان حسين فهمي عقب وفاة شقيقه، والذي رحل عن عالمنا في الساعات الأولى من صباح يوم الأربعاء الماضي بعد صراع مع مرض السرطان.
وقال تامر هجرس، في تصريحات إذاعية، افتقدنا بني آدم جميل جدًا وروح حلوة أوي، عمرنا ما حسينا بفرق السن هو عاش شاب ومات شاب، هو فعلًا شخص عزيز عليا جدًا وطبعًا أستاذ حسين فهمي.
وعن علاقته بالراحل مصطفى فهمي، علق تامر هجرس: إحنا دايمًا كنا بنتقابل كتير جدًا وفي سهرات وخروجات وقربنا لبعض أوي، وعملنا فيلم عمليات خاصة وكان بيحكيلي على مغامراته، وأي يوم كان فاضي فيه كان بيركب اللانش بتاعه في العين السخنة ولحد أواخر أيامه كان بيلعب تنس في نادي الجزيرة.
مرض مصطفى فهمي
وتابع حديثه عن الراحل مصطفى فهمي: الصيف اللي فات ده جاله الجلطة والسرطان، الموضوع حصل بسرعة جدًا ومتألمش لمدة كبيرة ودي رحمة من عند ربنا.
أما عن حالة الفنان حسين فهمي، فأوضح تامر هجرس: حسين فهمي متأثر جدًا بوفاة مصطفى، هما كانوا قريبين من بعض، وفكرة أن أخوك الصغير مات حاجة مؤثرة جدًا، وربنا يصبره ويعدي المرحلة دي، قالي امبارح إنه كان قاعد بيهزر ويضحك معاه قبل الوفاة بيوم، وتاني يوم ابنه كلمه قاله أنه توفى.
