شيرين عبد الوهاب: لقب ميس جينيس مش هيدايق حد.. وربنا طبطب عليا
عادت شيرين عبد الوهاب مرة أخرى إلى جمهورها بشكل قوي، وظهرت في لايف على تيك توك، والذي تواصلت فيه مع جمهورها وكشفت عن العديد من كواليس أعمالها الغنائية التي طرحتها مؤخرًا، ومنها بتمنى أنساك وغيرها.
شيرين عبد الوهاب: لقب ميس جينيس مش هيضايق حد.. وربنا طبطب عليا
وقالت شيرين عبد الوهاب: في يوم كلمت الدكتور بتاعي وتوما وتامر حسين، وقلتلهم إنتوا ليه إدتوني أغنية بتمنى أنساك لأن نجاحها كان يخوف، غير إنها بتوجعني ولكنها تجربة أي إنسان بيشوف حاجة وحشة في حياته بيتمنى ينساها وأنا شفت كتير أوي، في 10 سنين في حياتي عايزة أنساهم، وربنا هيجبلي حقي من أي حد زعلني.
وأضافت شيرين عبد الوهاب: أغنية يا بتفكر يا بتحس دي علم، ولبنان عزيزة أوي على قلبي وربنا يقف معاهم وأنا حزينة جدًا على اللي بيحصل فيهم لبنان، والصيف اللي فات مكنش صيف من غير لبنان، أنا مبروحش الجونة ولا الساحل بروح لبنان، وفي بلاد كتير أوي نفسي أدلعها، والفترة الجاية بحضر لحفلات كتير في بلاد الوطن العربي، مش بيشغلني هلبس ايه وهعمل شعري ازاي لما بيكون عندي حفلة، يا رب أفضل حقيقية على طول، والفترة الجاية في أغاني حب كتير، وممكن أعمل كتاب أوثق فيه حياتي وأعلم الناس ازاي يوصولوا لأحلامهم.
واستكملت قائلة: أنا عملت الحمد لله في مشواري الفني اللي رضاني ورضا الجمهور، ودلوقتي حابة أركز مع عائلتي، وسقف أحلامي مبينتهيش، ولكن ساعات بقول أنا معملتش حاجة خالص، والثقة بتيجي من عند ربنا ولكني شاكة في اللي بعمله.
وعن دخولها موسوعة جينيس قالت: لقب ميس جينيس ده متميز وفريد ومش هيضايق حد، وفرحانه جدًا مش علشان أنا اللي دخلت موسوعة جينيس ولكن علشان الأغنية المصرية وصلت للعالمية، وربنا وقف معايا كتير وهو اللي طبطب عليا، وبحضر لحفلات في كل بلاد الوطن العربي.
وأشارت إلى أنها بعد نجاح طريقي تخشى تكرار تجربة التمثيل مرة أخرى، ومتنجحش ولكن نفسي أقدم دور فلاحة أو صعيدية، ولكن مش رحلة صعود، والفترة الجاية فيه مفاجآت كتير.
جدير بالذكر أن شيرين عبد الوهاب تصدرت تريند منصات السوشيال ميديا، بعد طرحها العديد من الأغاني ومنها بتمنى أنساك، حبيبي، عسل حياتي وغيرها الكثير.
