أحمد داود: الأرقام مهمة في السينما.. ولازم تجيب فلوس علشان المنتج يتحمس
تحدث الفنان أحمد داود، عن رأيه في مفهوم نجاح الأعمال الفنية والحكم عليها من الإيرادات التي تحققها عند عرضها في دور العرض السينمائية، مشيرًا أيضًا لموقف طريف جمعه بشيكو قبل عرض فيلم يوم 13.
وتحدث أحمد داود خلال لقائه مع القاهرة 24، قائلًا: أنا مهم بالنسبالي تحقيق الأرقام في السينما، وقبل عرض فيلم يوم 13 كنت هموت وخايف علشان الإيرادات، وكلمت شيكو وكنت حاسس إن هيجيلي جلطة لأنه كان هيتعرض ليه فيلم ابن الحاج أحمد في نفس التوقيت، وقولتله القلق ده عادي قالي أنا لسه ضارب بتاع الدليفري بسبب التوتر.
وأردف: السينما لازم تجيب فلوس عشان المنتج يتحمس لـ الفنان، وكمان عشان يقدر يعمل أعمال كبيرة.
أعمال أحمد داود
وينتظر أحمد داود عرض فيلم الهوى سلطان، والذي تدور أحداثه في إطار رومانسي اجتماعي لايت عن العلاقات والحب بين الأصدقاء بشكل رومانسي كوميدي، والفيلم من بطولة منة شلبي، أحمد داود، أحمد خالد صالح، جيهان الشماشرجي، سوسن بدر، خالد كمال، فدوى عابد، نورين أبو سعدة، عماد رشاد، وتأليف وإخراج هبة يسري، ومن إنتاج شركة سي سينما برودكشنز، لـ هاني نجيب وأحمد فهمي.
وفي سياق آخر، تحدث أحمد داود عن الكيميا التي تجمعه بـ الفنانة منة شلبي خلال أحداث العمل حيث قال: اشتغلنا مع بعض مرتين، بس حاسس إننا أول مرة نشتغل مع بعض، وأنا محظوظ بمشاركتي معاها لأنها مجتهدة وبتحب شغلها.
