أبرز تصريحات أحمد السقا: شفت الموت في تصوير السرب والأكشن له رخصة.. ولما بغلط بجلد ذاتي
حل الفنان أحمد السقا، ضيفًا على الإعلامي معتز الدمرداش، في برنامجه ضيفي، المذاع عبر شاشة قناة الشرق، وتحدث السقا عن مشواره الفني وتفاصيل مشاهد الأكشن، وحياته الشخصية.
أبرز تصريحات أحمد السقا مع معتز الدمرداش
- كل ما الواحد بيعلى كل ما مساحة الإبداع بتقل، لأنك بتكون عملت شخصيات كتير، والاختيارات صعبة.
- أنا لسه ببدأ من أول وجديد، ومفكرش أني أرتاح والتحدي موجود على طول.
- مبرفضش أدوار الشرف، وفي الغرب بيعتبروها حاجة مشرفة جدًا، وبالبلدي اللي بعمله مع زملائي هيقعدلي.
- اللهجة المصرية هي الإنجليزي بتاع العالم العربي، إحنا ممكن منفهمش لهجات إخواتنا العرب ولكنهم بيفهمونا كويس، والفضل يرجع للسينما المصرية.
- بيتعرض عليا أشتغل مع شباب، وفي مرحلة من المراحل هيكون الشباب هما أبطال الأعمال، ولو أنا ضيف شرف هقبل أشتغل معاهم طبعًا، أنا معنديش عقد.
- السينما الأمريكية هي مصدر الدخل القومي رقم 2 بعد السلاح، وأمريكا لا تملك التاريخ عمرها كله 230 سنة، ولكنهم قدروا يصنعوا لنفسهم تاريخ بالسينما، والسياسة موازية لصناعة السينما في أمريكا.
- الأول كنت بعمل الأكشن بقلب ميت ولكن اكتشفت أنها دراسة، ولو هتتعلق على سلك يكون الوزن قد إيه، ولو العربية هتتقلب أعرف أحافظ على نفسي والبنزين فيها قد إيه واتجاه الرياح، بتبقى حسبة ديناميكية وعنصر الأمان أهم حاجة.
- في رخصة بناخدها من جنوب إفريقيا بتتجدد كل 3 سنين، والممثل اللي بيعمل أدوار خطر بنفسه لازم يبقى متأمين عليه، ولغاية دلوقتي رافض وجود دوبلير ليا.
- الحمد لله الواحد عنده مكتبة من أعماله.
- كنت بسافر كل يوم السويس 30 كيلو في الجبل علشان أصور فيلم السرب.
- شفت الموت 4 مرات في تصوير فيلم السرب، والثبات الانفعالي هو أساس الموضوع وسرعة رد الفعل، وده من عند ربنا.
- رباط البيادة اتفك في مشهد من مشاهد السرب، دخل تحت المجنزرة بتاعة الدبابة لقيت نفسي بتسحب ومن رحمة ربنا أني نطرت الجزمة ورميت نفسي بعيد.
- أنا كنت الأول في ثانوية عامة في البلاغة والأدب والشعر الجاهلي، أنا كنت بعرب الجرنال.
- جملة من النهاردة مفيش حكومة أنا الحكومة من فيلم الجزيرة بقت علامة في التاريخ، وبحمد ربنا أن بعد ما أرحل عن الدنيا الناس هتفتكر ليا شوية جُمل.
- فيلم إبراهيم الأبيض مكنش عنيف، هو كان بيلقي الضوء على مناطق موجودة، وأنا عملت معايشة شهرين مع الناس وهما اللي ساعدونا في التصوير.
- بحب شخصية عساف الغريب جدًا في نسل الأغراب، ومعنديش مصحح لهجة صعيدي لأن الخيل لففوني مصر كلها.
- لما بغلط بجلد ذاتي وممكن أطلع الكرفان أخبط دماغي في الحيطة، ومبندمش على حاجة قدمتها لأن كل دور عملته بمزاجي ولمزاجي.
- كان نفسي أطلع مصارع ثيران وأنا طفل، وخدت خطوة أني أطلع ضابط ولكن مكملتش.
- لسه بعمل حساب للكاميرا، وبعمل حساب ما وراء الكاميرا، وبحفظ الكرو كله بالاسم وده بيديهم دفعة معنوية زي ما جبرت بخاطرهم أكيد هيجبروا بخاطري.
- مبتضايقش من النقد، ولكن اللي بيضايقني التجريح وده بقى كتير اليومين دول.
- أنا عندي مرض اسمه المواعيد، بكره التأخير وأكره الانتظار.
