بعد انفجار هاتفه.. مستخدم يشكو من شركة شاومي Xiaomi Egypt: الموبايل كان هيحرقلي الأوضة

نشر مستخدم تجربته مع هواتف شركة شاومي Xiaomi Egypt، على حسابه الشخصي بمنصة x، ليفاجئ المستهلكين بانفجار هاتفه الذي كان على وشك أن يتسبب في نشوب حريق بغرفته، وعندما حاول التواصل مع خدمة العملاء لم يتعاملوا مع الأمر بجدية، فبدأ منشوره معلقا: موبايلي الشاومي انفجر وكان على وشك يحرقلي الأوضة.

مستخدم يشكو من شركة شاومي Xiaomi Egypt

ونشر حساب باسم محمد، منشورا يشكو فيه من هواتف شركة شاومي Xiaomi Egypt، موضحا: اترددت كتير إن أكتب بوست زي دا، وحاولت قدر الإمكان يبقى فيه أي حل ودي ولكن التوكيل مساعدنيش بأي حاجة، متابعا: كنت صاحي وحاطط الموبايل عالسرير، ومكنش بيشحن، بعدين صحيت والدتي، ونزلت أصلي.

واستطرد حديثه قائلا: والدتي بعد ما أنا صحيتها ونزلت، سمعت صوت انفجار كبير، دخلت الأوضة وكان فيه ريحة شياط صعبة أوي، الموبايل كان بيطلع دخان وفيه شعلة نار بدأت تظهر، وخدت الموبايل رمته في المطبخ وفتحت عليه الماية علشان تطفي الحريق اللي كان اخترق طبقات كتير من اللحاف.

وأضاف: كان فاضله طبقة واحدة بس ويوصل للسرير، وكان الحريق هيبقى صعب السيطرة عليه بس ربنا ستر الحمد لله، ببص لقيت الموبايل عبارة عن قطع كل قطعة لوحدها من الفرقعة، وقطع الموبايل بالكامل متفحمين من جسم الجهاز للبطارية للجراب للكاميرا لكل حاجة.

وأبلغ محمد مركز الصيانة الذين سمعوا شكوته، ثم قالوا له: قدر الله وما شاء فعل يا فندم، مفيش حاجة نقدر نقدمهالك.

الجدير بالذكر أن صاحب الحساب ذكر سبب تجاهل الشركة لمطالبه، أنه في شهر سبتمبر الماضي حدثت مشكلة في شاشة هاتفه، لكن عند ذهابه للتوكيل لم يجد شاشات فاضطر أن يلجأ للمتاجر الخارجية، ولكنه يزعم أن الشاشة هي الجزء الوحيد الذي لم يتضرر من الحادث بخلاف باقي أجزاء الهاتف.