مصطفى قمر: مبحبش تصنيفي في جيل التسعينات.. ومحمد منير لن يتكرر
حل الفنان مصطفى قمر، ضيفًا على الإعلامي عمرو الليثي، في برنامجه واحد من الناس المذاع عبر شاشة قناة الحياة، وتحدث خلال اللقاء عن تفاصيل مشواره الفني ورأيه في تصنيفه من جيل التسعينات.
أبرز تصريحات مصطفى قمر مع عمرو الليثي
- أغنية حبيب حياتي عمرو مصطفى جابهالي وسمعهالي، وعجبتني وهو ملحن شاطر وعامل تيمة حلوة، وهي أغنية حلوة وناجحة وكان لازم أعمل شوية إضافات وكنا عايزين نعمل حاجة مختلفة في الكليب بتاعها، والمنتج محسن جابر كان مهتم بيها وهو تاريخ وقيمة.
- أغنية حبيب حياتي كانت نقلة ليا بعد أغنية الليلة دوب.
- محمد منير بالنسبة ليا العشق، ولما بقابله بحس أني رحت في حتة تانية، وتجربته لن تتكر.
- علي الحجار ومدحت صالح أثروا فيا.
- تأثرت بـ مايكل جاكسون، هو عمل في حياته 5 ألبومات ولغاية النهاردة أعلى مبيعات، والموضوع مش كل يوم تنزل أغنية سينجل، ولكن الفكرة أنت عايز تسيب إيه، في الفن آه تعمل فلوس ولكنها مش الهدف الأول.
- هروبي من حتة التسعينات دي دلوقتي، أنا لما يطلبوني في حفلة اسمها تسعينات أقول لهم لأ، أنتوا عايزين تصنفوني في منطقة التسعينات؟، أنا تسعينات وألفينات و2010 و2020.
- لغاية قريب عملت ديو لطيف مع محمد نور في أغنية شوفتوا القمر وكسرت الدنيا، ودلوقتي أغنية صناعة مصرية وعملت نجاحات جبارة في الألفينات.
- أنا المزيكا عشقي، وفي هبة من ربنا بيديها للبني آدم، والمهم أنه يحس بقيمتها لأن في مقاييس تانية، في ناس بتحب الفلوس أكتر من الشهرة، وناس تحب الحاجات اللي بيمتلكوها أكتر من الفن، وأنا عايز أكتر من الشغل الحلو والأغنية تفضل.
- أنا مبمشيش بموضة الأفية، وسر استمراريتي الاختيارات.
