وظائف بالمطارات وبدل مواصلات.. مصري يطلق مبادرة لتوفير فرص عمل باليابان
أطلق عبد الرحمن يونس رئيس تحرير مجلة مصر الدولية في اليابان، مبادرة لتوفير فرص عمل لـ المصريين في اليابان، ونشر تفاصيلها عبر حسابه بموقع التواصل الإجتماعي فيسبوك، حيث قال في منشور له: في اليابان عاصرنا تجربة المصريين اللي بيحاولوا يعملوا لجوء علشان ميرجعوش مصر تاني، واللي بييجي سياحة وعاوز يكمل ويدور على شغل وغيره من المشاكل، اللي الهدف الوحيد فيها هو لقمة العيش الحلال.
مصري يطلق مبادرة توفير فرص عمل للمصريين في اليابان
وتابع عبد الرحمن يونس، في منشوه قائلا: علشان كده فكرت بجد وحطيت خطة إني اتفاوض مع شركات التوظيف في اليابان، لاستقدام عمالة مصرية بشكل شرعي وقانوني، يحفظ كرامة الشخص اللي هيشتغل وفي نفس الوقت يكسب ويتعلم ويلاقي مصدر يعينه على مستقبله الحلال، وقابلتني مشاكل كتير أولها إن العمالة المصرية مش على قائمة الدول التي سهل عمل التأشيرات لها، والثقافة مختلفة وكمان الشركات اليابانية لازم تجرب الأول وتقتنع، علشان يبقى الموضوع منتظم دون ملل، وكملنا وعملنا فوق الـ 20 مقابلة على مدار شهور لشركات كتير لحد ما ربنا وفقني، وقدرنا نعمل برنامج توظيف بالتعاون مع شركة حكومية عملاقة في اليابان، بعد ما أخدوا ضمانات تهد جبال وتحديد طريقة عمل التأشيرات بشكل آمن، يحفظ حقوق الموظفين وبدعم من سفارة مصر في اليابان وعلى رأسها السفير محمد أبوبكر، خصوصًا إن إمكانيات الشركة تسمح بكده جدا لأنها شركة كبيرة ورائدة في هذا المجال.
وأضاف عبد الرحمن يونس، رئيس تحرير مجلة محطة مصر الدولي في اليابان، أن البرنامج هيعمل على إحلال جزء من العمالة الحالية في المطارات اليابانية بعمالة مصرية، وعلى سبيل البداية هنبدأ بـ 3 مطارات هما ناريتا في محافظة تشيبا وهانيدا فى محافظة طوكيو ومطار سابورو في هوكايدو، وميزة البرنامج في أكتر من حاجة، الأولى إن التأشيرة هاتطلع من الشركة اليابانية والتعاقد لمدة سنتين، وبعد كده كل واحد يقدر يدور ويشتغل شغل تاني زي ما يحب في الفترة المتبقية ليه، من التأشيرة اللي هي أكتر من سنتين حسب الأوراق المقدمة، والشخص اللي هيسافر مش هتدفع ولا مليم لا لشركة ولا وسيط ولا غيره مجرد بس السي ڤي والشركة في اليابان تقتنع بيه مش أكتر، وغيرها من المميزات اللي هايحصل عليها بشكل محترم ودون مرمطة زي ناس كتير لما بتسافر بره.
واستكمل عبد الرحمن يونس، الشغل هيوفر غير المرتب المعلن حوالى 25% من المرتب دعم للمعيشة، وكمان مبلغ منفصل للمواصلات ودا مش مكتوب لأنه بيختلف حسب كل وظيفة وطبيعتها، والمعلن بس المرتب الأساسي كحد أدنى لكل فرد، والشركة في اليابان طالبة مني 100 واحد دفعه أولى، التجربة جديدة وممكن تكون مميزة، واشتراطات اللغة مش كبيرة يعني ممكن ناس كتير تجرب حظها.
