عملت فيديوهات على تيك توك علشان حد يساعدني.. سيدة تستغيث لعلاج ابنها من ضمور المخ
استغاثت سيدة تدعى دينا شريف، مقيمة في منطقة إمبابة بمحافظة الجيزة، لعلاج ابنها نور، 12 سنة، من مرض ضمور في المخ، الذي يحتاج إلى علاج يتكلف الآلاف.
سيدة تستغيث لعلاج ابنها من ضمور المخ
وقالت والدة نور في تصريحات خاصة لـ القاهرة 24، إن نجلها كان طفلًا سليمًا عند الولادة، إلا أن صحته تدهورت تدريجيًا حتى تم تشخيصه بمرضين عصبيين، هما ضمور المخ وفرط الحركة، مما يتطلب منه رعاية طبية متخصصة وتكاليف علاجية باهظة.
وتابعت: حالة ابني تسوء يوما عن يوم ومحتاج يتعالج ومحتاج مدرسة فكرية عشان يتعلم ومش معايا فلوس خالص، ومقدرش أشتغل واسيبه في البيت لأن عنده إعاقة ذهنية وممكن يموت نفسه أو يعمل أي سلوك عدواني، والدكاترة وصفولي أدوية وعلاج بس مفيش فلوس اشتريها ودلوقتي حالته بتدهور بسبب ضمور خلايا المخ.
وتابعت: حالة الطفل ماتسمحش إني أشتغل خالص لازم أساعده في اللبس والأكل وكل حاجة بيعملها في اليوم ومش قادرة أوفرله مصاريف علاجه، لدرجة اضطريت اعمل فيديوهات على تيك توك بستغيث لعلاج ابني على الأقل يجيلي تبرعات من حد أو ناس تساعدني، مصدر دخلي الوحيد إني ممكن كل فين وفين بروح أنظف وأمسح البيوت.
وناشدت بالحصول على تكاليف علاج طفلها نور بسبب تدهور ظروفها وحاجته للعلاج، معقبة: نفسي حد يساعدني في مصاريف علاج ابني لأن معنديش مصدر دخل ثابت لحد دلوقتي، وجوزي مطلقني ومش بيديني نفقة غير 500 جنيه أعمل بيهم إيه في ظل الظروف دي ومعايا 3 أولاد.
