كان بيكرهني ودايما بينتقدني.. رامي ربيعة يكشف أسباب استبعاده في فترة موسيماني
كشف رامي ربيعة أسباب استبعاده من التشكيل الأساسي في فترة تولي الجنوب إفريقي بيتسو موسيماني تولي قيادة الأهلي.
تصريحات رامي ربيعة
وقال رامي ربيعة في تصريحات تليفزيونية: كان فيه معاناة كبيرة يتعرض لها أي لاعب كرة قدم، وفي الكورة هناك مدرب يحب ويكره، وعلينا في النادي الأهلي أن نحترم كل الناس والمدربين.
وأضاف رامي ربيعة: مش هتأذي حد غير نفسك لو اتكلمت أو اعترضت، وفي المرحلة اللي اتعرضلتها دي أيام بيتسو موسيماني قفلت ودني وقفلت كل حاجة ومتكلمتش، ومش معنى أنه كرهني إني أتكلم عنه وحش، لأن نتائجه بتتكلم إن شغله كويس.
وأكمل رامي ربيعة: طبيعي أي واحد هيزعل لو ملعبش، وأنا محبيتش أعيش دور الموظف في يوم من الأيام وميبقاش ليا دور في النادي، وللعلم أنا لسة هغلط وفيه أخطاء هعملها وهي دي الكورة لأن مفيش حد هيوصل للكمال.
وأردف ربيعة: أنا مش مع إن اللاعب لما ميلعبش ويكون كبير وليه اسم أنه يتكلم بل لازم تشتغل على نفسك وطول ما أنت بتلعب لازم تثبت نفسك وتحقق اسم جديد، وكان فيه لعيبة كبيرة بدون ذكر أسماء بتعمل مشاكل مع موسيماني وبتتكلم بأسلوب وحش، بس أنا كنت بخرّج الغضب بتاعي في الجيم.
وواصل رامي ربيعة: في كأس العالم للأندية 2020 موسيماني استبعدني، ولذلك فكرت في الخروج إعارة بسبب الخروج من حساباته، واتكلمت مع عماد النحاس المدير الفني للمقاولون وقالي الفكرة إنك تختار مدرب يعرف يطلع اللي عندك، فـ قولتله أنا محتاج ألعب، ولما كلموني تاني كان سيستم القيد قفل فـ كملت في النادي الأهلي.
وزاد رامي ربيعة: البطولة اللي بعدها 2021 بقيت كابتن الفريق وأفضل لاعب في مباراة مونتيري الأولى في كأس العالم للأندية، ومع ذلك، في المحاضرة اللي بعدها موسيماني جابلي غلطاتي وانتقدني بس أنا سيبته يتكلم خالص، ووليد سليمان كان ماسك إيديا بيهديني.
واستطرد رامي ربيعة في تصريحاته: رغم ذلك خرجت من المحاضرة مبسوط بالجائزة ومهتمتش لكلامه، ولازم لعيب الكورة يقيّم نفسه وطبيعي يكون فيه غلطات ومن الغباء إنك تطلع نفسك عامل ماتش كويس بس الطبيعي يكون فيه أخطاء، ولما تبقا عارف الشخصية اللي قدامك فـ مش هتبقى مستني كلمة حلوة منه.
وأنهى المدافع تصريحاته عن بيتسو موسيماني قائلًا: المدرب كان بيكرهني، وكان بيحسسني إني سبب في الجون أو سبب في خسارة.
وكشف رامي ربيعة عن طبيعة الإصابة التي تعرض لها، قائلًا: الإصابة هي إجهاد خفيف في الضامة ولما حسيت بوجع طلبت التغيير أحسن ما تزيد، وبعد التوقف الدولي إن شاء الله هرجع من جديد.
واختتم رامي ربيعة تصريحاته قائلا: حدث تواصل بيني وبين الكابتن إبراهيم حسن واتكلمت معاه وقولتله أنا مصاب وكلمنا الدكتور أبو العلا وعرفناه إن الإصابة ممكن تستمر من أسبوع لـ 10 أيام، فـ قررت أعمل أشعة عشان أتأكد، وقابلت كابتن حسام حسن وأنا بعمل الأشعة وقولتله لسة هعمل الأشعة وهأكد على حضرتك تاني بردو، ولما اتأكدت قولتله فـ قرر إني أخد راحة، ولو كنت كملت على الإصابة كان جالي مزق بس الحمد لله.
