تامر حسني يدعم هيثم سعيد بعد ابتعاده عن الفن وهجرته لأستراليا: مستعد نشتغل سوا
دعم الفنان تامر حسني، الفنان هيثم سعيد بعد إعلانه هجرته لأستراليا بسبب يأسه من عدم عمله في المجال الفني، مشيرًا إلى أنه يعرض عليه التعاون في عمل يجمعهما.
وكتب تامر حسني، منشورًا عبر حسابه الشخصي بموقع انستجرام، قال فيه: حبيبي هيثم أنا أكيد أزعل لما أشوف فنان جميل زيك يصيبه اليأس بالشكل ده أنا فاهمك وحاسس بيك كويس، طبعا محدش عارف داخليات الناس، وأنا ممكن أبقى مش عارف إيه اللي خلاك وصلت لكده، رغم إن في ناس من جيلنا كملوا وصبروا وكان عندهم شغف وإصرار على النجاح كبير.
وأضاف تامر حسني: أنت عارف أنا شوفت إيه من حروب بس كملت واتحديت الظروف، مش عارف أقولك ليه مصممتش ولا أقولك متزعلش على اللي أنا معرفش عنه حاجة؟ ربنا بس العالم بيك، وعالم أنت شوفت إيه وحسيت بإيه.
تامر حسني يوجه رسالة إلى هيثم سعيد بعد ابتعاده عن الفن
وأردف: بس خليني أقولك حاجه أجمل من ده كله، أتأكد من حاجة زي مانت متأكد إن اسمك هيثم وأكثر كمان، ربنا لما بيقفل باب بيبقى عايزك تفهم إنه قفله عشان يوجهك تروح باب تاني، أفضل مش عشان يزعلك، ومادام أنت اخترت تسافر تجرب مش عيب، جرب جايز تلاقي نجاح عالمي حصلك أكبر من اللي كنت بتحلم بيه.
وأكمل: نصيحة ليك برضو أدرس التوزيع الموسيقى عشان تعمل مزيكتك بنفسك وجایز تبقى مؤسسة كبيرة في يوم من الأيام، بتصنع مزيكا ليك ولغيرك، وتقدم ناس مع شطارتك كمطرب.
واختتم تامر حسني حديثه: لو حسيت بأي صعوبة ارجع وكلنا حواليك إن شاء الله، وأنا جانبك وجانبك من دلوقتي، لو حابب ترجع ونحط خطط جديده للشغل وتقف تاني من جديد، أنت فنان جميل وشكل جميل ومحترم، وتستحق كل خير، فكر يا صاحبي، وأنا بعون الله معاك.
