اعترافات المتهم بدهس 4 شباب بدائري الوراق: كنت ماشي بسرعة 80 وتفاجأت بشخص بيعدي الطريق
كشفت التحقيقات في واقعة تعرض 4 شباب لحادث دهس من قائد سيارة ملاكي يقودها برعونة أعلى الطريق الدائري بالوراق، تفاصيل الواقعة.
دهس 4 شباب أعلى الطريق الدائري بالوراق
وحصل القاهرة 24، على أقوال السائق أمام جهات التحقيق وجاءت كالآتي: أنا اسمي عبد الرحمن. س، 26 سنة، وشغال مدير شركة، واللي حصل إني أنا النهاردة 2024/11/4 قبل الفجر بشوية كنت راجع من حدائق الأهرام وماشي بعربيتي على الطريق الدائري اتجاه الوراق والطريق كان فاضي وكنت ماشي بسرعة الطريق المعتادة 80.
وأضاف المتهم في اعترافاته أمام جهات التحقيق: وعند سلم الحفرية تفاجأت بشخص بيعدي الطريق وأنا كنت ماشي في ثاني حارة من ناحية الشمال فغيرت اتجاه بالعربية ناحية اليمين عشان اتفاداه ودوست فرامل في نفس الوقت فالعربية عومت مني فغيرت اتجاه الغربية للشمال وبعدين غيرت اتجاه العربية يمين جامد ولقيت نفسي ماشي في اتجاه الرصيف بتاع الطريق عند سلم الحفرية وخبطت في الرصيف والعربية وقعت تحت الكوبري على ظهرها.
وتابع: ساعتها أنا محصليش حاجة بسبب أني كنت لابس الحزام والاير باج وبعدين طلعت من العربية لقيت واحد بيقول حد يجيب طفاية حريق عشان كان في شرارة في العربية، وطفوها وبعدين لقيت واحد ورا العربية معرفش اسمه واقع وفيه إصابات والناس بتقول إنه توفى وبعدين طلبوا الإسعاف والشرطة جت خدتي وأنا معرفش إذا كان في حد اتصاب ثاني من الحادث ولا لا، ودا كل اللي حصل.
