يسري نصر الله ينتقد منع فيلم الملحد: رئيس الرقابة بيتهم بازدراء الأديان.. وخالد عبد الجليل يرد: مرفوع عليا 7 قضايا
تحدث المخرج يسري نصر الله عن حقوق السينما في مصر، وسبب منع الكثير من الأفلام وآخرهم فيلم الملحد للمنتج أحمد السبكي، مؤخرًا.
وقال يسري نصر الله خلال ندوته بمهرجان القاهرة السينمائي: من سنة 2011 واحنا بنعمل اجتماعات وبنكتب تقارير لاسترداد حقوق السينما وفي الآخر بتتركن طيب ليه؟! النهاردة بسمع حاجات غريبة ومذهلة زي رفع رسوم الرقابة على الفيلم، يعني اللي هيعمل فيلم هيتخرب بيته، والنهاردة خالد عبد الجليل بيتحاكم لأن القرار بتاع رسوم الرقابة متمضاش من الرقابة.
منع الملحد
واستكمل يسري نصر الله حديثه: خليني أعمل الفيلم بتاعي وبعدين راقبه، في عندنا حالة عظيمة عايشينها مع فيلم الملحد والرقابة صرحت بالملحد، والنهاردة بطالب الرقابة أنها تديني الحرية والتصريح للتصوير، الأزهر مش رافع قضية اللي رافع القضية المحاميين بتهمة ازدراء أديان يعني رئيس الرقابة ممكن يدخل السجن لأنه صرح بعرض الملحد اللي مفيش فيه أي حاجة تُسيء للدين زي ما كان بيحصل مع أفلام يوسف شاهين.
وأضاف يسري نصر الله: زي أيام يوسف شاهين وأفلامه كان أي حد بيرفع عليه قضية بتهمة ازدراء الأديان ولما كنت بقول أنا ضد الرقابة كان بيتقالي لا الرقابة لما بتديلك التصريح فهي محصنة وبتشيل عنك المسؤولية، ليرد عليه رئيس الرقابة على المصنفات الدكتور خالد عبد الجليل قائلًا: أنا مرفوع عليا 7 قضايا بسبب فيلم الملحد.
كما تحدث الفنان باسم سمرة عن علاقته بالمخرج يسري نصر الله على هامش الندوة، مشيرًا إلى أن لدينا مشكلة في منع الأفلام بمصر، قائلًا: أتمنى توجيه الكلمة للمسؤولين عن صناعة السينما وفي ناس بتدي السينما في بلادها وده حقهم، إحنا بنرجع ورا على مستوى منع أفلامنا أو الاستوديوهات اللي بتتحرق أو قمع ضدنا.
