ابنته طردته.. مسن بالإسكندرية يستغيث للعودة إلى منزله: استغلت ظروفي الصحية ومضتني على عقد بيع
ناشد رجل مسن يدعى محمود محمد، من منطقة محطة الرمل بمحافظة الإسكندرية، الجهات المسئولة للعودة إلى منزله بعدما أصبح مشردًا وبلا مأوى، بعد قيام ابنته بطرده من المنزل واستغلال ظروفه الصحية وتوقيعه على إقرار لبيع منزله قبل 3 سنوات.
أب يستغيث من ابنته بعد طرده
وقال الأب محمود محمد عبد الرحيم، البالغ من العمر 75 سنة، في تصريحات خاصة لـ القاهرة 24: المشكلة بدأت منذ 2021 وبنتي استغلت ظروف مرضي وحالتي النفسية لأني باخد أدوية للاكتئاب ومهدئات وخلتني أبيع لها الشقة اللي أنا ووالدتها عايشين فيها، وأنا مضيت ومكنتش أعرف وقتها إني بيعت بيتي ليها أنا راجل كبير وعلى قدي.
وأضاف: بنتي من زمان تعباني وبتعمل معايا مشاكل ودلوقتي رمتني في الشارع ورمت لبسي وحاجتي على السلم، واستغلت إني كنت برة في مشوار وغيرت كالون الشقة، عشان منعرفش نفتح الباب ومرمي في الشارع وشردتني.
وأشار إلى مرضه الشديد بالإضافة لمرض زوجته التي تعاني من الشلل قائلًا: مليش مأوى، ومش عارف أشوف مراتي وتعبان ومش عارف أعمل ايه، وأنا راجل كبير هروح فين واتصرف ازاى، أنا وابني كل يوم في حتة شكل وأحوالنا المادية صعبة.
واختتم الأب حديثه بخيبة أمل وانكسار قائلًا: مش عارف ليه بنتي عملت معايا كده، بعد ما ربيت عيالها وصرفت عليهم وخيري عليها كل شهر كنت بديها مصروف وفلوس في إيديها، بس هي استغلت تعبي وإني مريض نفسي، وخدت فلوسي من البنك بعد ما عملتلها توكيل عشان تقبض المعاش بتاعي.
