لؤي: أحب أبقى تريند بـ أعمالي الغنائية وليس بسبب الأزمات
تحدث المطرب لؤي، عن رأيه في تريندات السوشيال ميديا، مؤكدًا أنه يُفضل أن يتصدر التريند بـ أعماله الغنائية وليس بسبب الأزمات.
وقال لؤي، في لقائه مع القاهرة 24: التريند ده جديد، ولو كان التريند موجود من 2003 كان كل الي بنعمله هيكون مصايب، وهو لغة العصر دلوقتي، مضيفا: بحب أنجح باللي ربنا إداهولي مش تصرفاتي غير في الخير وده موضوع تاني.
لؤي يكشف سبب ابتعاده عن الساحة الفنية
وعلى جانب آخر، سبق وأن كشف المطرب لؤي، سبب ابتعاده عن الساحة الفنية خلال الفترة الماضية، حيث قال في تصريحات تلفزيونية: أنا لم أبتعد عن الوسط الفني، ولكن مع الأسف الناس بيحبوا تتبع المشاكل وعورات الغير، وبدل ما يبص للفن اللي بنقدمه بيبص للفضايح ومين اتجوز ومين اتطلق، وكمان من 2008 صناعة الموسيقى ضايعة خالص بسبب الإنتاج.
وأضاف: فيه أزمة في حقوق الملكية الفكرية، وبقينا كـ مطربين ننتج الأغاني لنفسنا وطبعا دي مسؤولية كبيرة خاصًة أننا عندنا بيوت وناس ورانا، وبقول للجمهور انتوا متعرفوش الفنان دا بيصرف ازاي والتزاماته إيه، ومن بداياتي خالص كنت متعود يكون معايا شركات إنتاج، إنما دلوقتي مفيش إنتاج ودا بقى على عاتقي، والأغنية عمرها ما بتجيب عائد الإنتاج، وصناعة الموسيقى كمان مش بتجيب فلوس، ونشوف كام مطرب وملحن وموزع بعدوا عن الوسط بسبب الظروف دي، ومع ذلك بنحاول نكمل؛ لأننا بنحب الفن.
