الاثنين كيلو بجنيه ونصف.. مصور فيديو بائع البصل في ميلانو: المصريين بيتعاملوا مع اليورو على إنه جنيه| خاص
بصل الاتنين كيلو بجنيه ونص.. جملة مصرية لا تردد إلا على لسان أي تاجر مصري بأسواق مصرية، ولكن بهذه العبارة استطاع شاب مصري مقيم بإيطاليا، أن يخطف أذهان المارة بأحد أسواق مدينة ميلانو الإيطالية، ليصبح حديث منصات التواصل الاجتماعي على مدار الأيام القليلة الماضية.
فيديو بصل الاتنين كيلو بجنيه ونص
وتداول مستخدمو مواقع التواصل الاجتماعي، مقطع فيديو لشاب مصري يعمل بأحد الأسواق في مدينة ميلان، حيث ظهر تحديدًا في سوق مجاور لـ ستاد سان سيرو، وهو يقف بجوار بضائع من الخضار والفاكهة، وينادي بصوت عالي وكأنه يبيع في أسواق العتبة أو وكالة البلح، قائلًا: بصل الاتنين كيلو بجنيه ونص.
وكشف محمود فرغلي، صانع محتوى مصري ومصور فيديو بائع البصل بسوق ميلانو، في تصريحات خاصة لـ القاهرة 24، كواليس تصوير فيديو بصل الاتنين كيلو بجنيه ونصف، حيث قال: المصريين هناك في إيطاليا بيتعاملوا مع اليورو على إنه جنيه مصري، والأسواق في إيطاليا كلها مصريين، المصريين في إيطاليا بيتكلموا إيطالي كويس ولكن بيسهلوا على بعض التعامل بالجنيه، ولكن كله فاهم إنه باليورو.
كواليس تصوير فيديو بصل الاتنين كيلو بجنيه ونص
وقال محمود فرغلي، مصور فيديو بائع البصل بسوق ميلانو: أنا بسافر كتير، وعلطول بصور الأماكن والوجهات السياحية، ولكن استوقفني المنظر في سوق ميلانو، وخاصة إن المكان مش شعبي وجنب ستاد سان سيرو في ميلان، وكنت نازل أشتري أكل، لقيت المنظر دا في السوق، ولما سألت المصريين اللي موجودين في السوق، قالوا لي إنهم في آخر اليوم بيلموا البضاعة وبينضفوا مكانهم، وبيتنقلوا لسوق تاني ومن منطقة لأخرى في ميلانو.
وأوضح محمود فرغلي: في فاكهة وخضار وهدوم، وكل مستلزمات البيت، والأسعار في السوق دا بتكون نصف الأسعار لـ المنتجات المباعة في المحلات التجارية، والإيطاليين متعايشين مع وجود المصريين ومرحبين جدًا بوجودهم، وإيطاليا هي البلد الوحيدة اللي روحتها ولقيت إن أهلها مش متضايقين من وجود المصريين أو الجنسيات الأخرى.
وأضاف: رد فعل الناس على الفيديو، مضحك ومحدش كان مصدق إنه السوق دا في إيطاليا، إلا لما شافوا عربية عليها نمر أجنبية، والتجار في السوق هناك زي مصر بيحاولوا يلفتوا الانتباه لـ البضاعة بأي شكل، وبيكون واحد واقف يبيع والتاني بينادي بالأسعار، ولما اتكلمت مع المصريين الموجودين، قالوا إنهم علطول بيشتروا منهم خضار وفاكهة أكثر من أي حاجة تانية، لكن الملابس وباقي المستلزمات بيشتروها من أماكن تانية، وبسعر بالنسبة لليورو بيكون مناسب.
