مي فاروق: الناس اللي ظلمتني متحرم عليهم جنازتي والعزا عليّا
كشفت الفنانة مي فاروق، عن وصيتها، بعد تأثرها في جنازة الملحن محمد رحيم، حيث أوصت الفنانة بأنها تعرضت للظلم الشديد من قِبل المحيطين بها، مطالبة الجميع بتنفيذ وصيتها.
وكتبت مي فاروق منشورًا، عبر حسابها الشخصي بموقع التواصل الاجتماعي فيسبوك، قالت خلاله: الدنيا ولا تسوى ولا مستاهلة، الحبايب بيروحوا في لحظة، راعوا ربنا في معاملاتكم عشان تسيبوا سيرة طيبة تفضل مكملة بعدكم لأولادكم، ركزوا مع اللي بتحبوهم من قلبكم قوي في الدنيا قبل الآخرة، طلعوا المؤذيين واللي ظلموكم بره حياتكم بسرعة.
وأضافت: أرضوا ضميركم أمام الله، واعملوا الخير، والطيب اللي هيفضل لكم وواجهوا نفسكم بأخطائكم قبل فوات الآوان، أنا عن نفسي ولأن الدنيا مش مضمونة، بدعي ربنا من قلبي يكون كاتب لي أوقف ولادي على رجلهم، وبعدين أسيب الدنيا، ويوم ما أسيبها أتمنى أقابله بنفس نضافة قلبي، اللي ربنا عارفه.
وتابعت: أما الناس اللي ظلمتني وأذتني عارفين نفسهم وأهلي يعرفوهم متحرم عليهم الصلاة عليا، ولا جنازتي ولا عزايا، ولا يقربوا من ولادي، عشان هيبقوا كدابين ومنافقين ومش مسمحاهم في الدنيا ولا في الآخرة.
واستكملت: أصل المسامحة دي قدرات وربنا مش بيكلف نفس إلا وسعها، على قد كل الطيب الحلو اللي شافوه مني وقابلوه بأذى والحمد لله لا بنرد أذى ولا بنضر، بنفوض أمورنا لله وحده وبيكرمنا وافضلوا كملوا في الحلو متبطلوش كله بنعمله لربنا ولنفسنا وبيقعد لنا بعد ما نمشي، اعتبروها وصية متعلقة في رقبة كل اللي يعرفني، الدنيا متفاتة وفي الآخرة كله بيبان، وبعد ما نمشي مش هيفضل مننا إلا سيرة، يا رب اجعلها طيبة ومكملة مع ولادنا يا رب.
