قبل محاكمته.. ننشر أقوال سعد الصغير في قضية المخدرات

تنظر محكمة جنايات شمال القاهرة المنعقدة بمجمع محاكم العباسية، غدا ثاني جلسات محاكمة المطرب سعد الصغير بتهمة إحراز جوهَرَي الحشيش والترامادول المخدرين بقصد التعاطي.

قضية سعد الصغير

وحصل القاهرة 24 على نص التحقيقات مع المطرب الشعبي سعد الصغير، في اتهامه بحيازة سجائر إلكترونية تحتوي على المخدرات من جوهري الحشيش والمخدر، في أثناء عودته من أمريكا مرورًا بالدوحة متوجهًا إلى مصر، وبتفتيش حقائبه عُثر على 9 سجائر من فئة الفيب تحتوي على المخدرات.

واستمع رجال التحقيق بالنيابة العامة لاعترافات سعد الصغير، في اتهامه بحيازة المواد المخدرة، وجاءت أقواله كالآتي:

اللي حصل إن أنا من حوالي 4 أيام سافرت أمريكا كنت رايح أشتغل وأعمل حفلتين للي منظمهم، وهو اللي طلبني في أمريكا ونظملي الحفلتين وبعد ما خلصت أداني هدية مجموعة من الفيب - سجائر إلكترونية - وقال فرقهم على الفرقة بتاعتك عشان هو عارف إني مش بشرب سجاير، وأنا كنت عارف إنها سجائر عادية فأخدتهم وركبت الطائرة من أمريكا وكنت راجع على مصر وفيه ترانزيت في الدوحة في قطر، وكنت معايا شنطة واحدة فيها لبسي منهم بدلتين، وفيهم الكيس الأسود اللي جواه سجاير الفيب - السجائر الإلكترونية- اللي إدهالي، ووصلت مطار القاهرة قبل الفجر.

وأضاف سعد الصغير في اعترافاته أمام جهات التحقيق: لقيت فرد جمرك بيسألني معاك حاجة قلت له مش معايا غير شوية سجائر فيب، وقالي هات الشنطة الفيب دي هتتجمرك وخد الشنطة وفتحها ولقى في الكيس حوالي 19 جهاز سيجارة فيب، وقالي إن في 9 منهم ريحيتهم مش حلوة، قلت له يعني إيه قالي يعني كويسين؟ قلت له طب اتأكد عشان كلهم زي بعض، وقالي لا هم الـ 9 دول مش كويسين، وعمل حضر ورجعلي باقي السجائر الفيب والشنطة وخد الـ 9 اللي بيقول عليهم، وده كل اللي حصل.

وشرع رجال التحقيق في سؤال سعد الصغير عن كيفية حصوله على السجائر الإلكترونية المخدرة، وكيفية ضبطه بمطار القاهرة، وتفاصيل رحلته إلى أمريكا والعودة منها، وجاءت كالآتي:

أقوال سعد الصغير في التحقيقات

س: متي وأين حدث ذلك؟ 
ج: الكلام ده حصل قبل الفجر يوم 10 - 9 - 2024 في مطار القاهرة صالة رقم 3 وصول دولي.

س: ما سبب ومناسبة وجودك بالمكان والزمان بالبيان؟
ج: أنا كنت راجع من السفر من أمريكا

س: ما تفصيلات الرحلة التي حضرت على متنها البلاد؟

ج: هي رحلة الطيران القطري، مش فاكر رقمها، بس أنا ركبت من أمريكا أول أمبارح 8/9/2024 وكان فيه ترانزيت في الدوحة، وصلت امبارح 11 مساء في الدوحة، وقعدت هناك كام ساعة وجيت على مصر.

س: ما الغرض من تلك الرحلة لدولة الولايات المتحدة الأمريكية؟
ج: أنا كنت في ولاية تيكساس كان عندي حفلتين وخلصتهم ورجعت.

س: ما مدة إقامتك بتلك الدولة؟
ج: أربعة أيام بس ورجعت.

س: ما طبيعة وصف الحقائب حيازتك؟
ج: أنا كان معايا شنطة سفر صغيرة لونها روز كنت بجرها وبمشي بيها على الطائرة.

س: ما محتوى تلك الحقيبة؟
ج: كان فيها لبسي وكان فيها كيس بلاستيك أسمر في سجائر الفيب -سجائر إلكترونية- اللي منظم الحفلة ادهالي هدية.

س: صف لنا تلك السجائر الإلكترونية حيازتك؟
ج: هي عبارة عن حوالي 19 جهاز فيب بنكهات تفاح وعنب وحاجات تانية.

س: من أين تحصلت على تلك السجائر الإلكترونية؟
ج: من واحد اسمه راغب، وهو منظم الحفلتين اللي كانوا في أمريكا، وهو أمريكي من أصل مصري وعايش في أمريكا.

س: ما محتوى تلك الأجهزة للسجائر الإلكترونية؟
ج: هي جواها فيب بنكهات وروائح مختلفة عنب وتفاح وحاجات كده، وأنا مسألتوش ده عبارة عن إيه لأني كده كده مش بشرب سجاير وكنت فاكرها سجاير عادية.

س: صف لنا مكان وضعك لتلك الأجهزة للسجائر الإلكترونية بحقيبتك؟
ج: هم كانوا مع لبسي في الشنطة لأنها أصلا شنطة مش كبيرة واتفتشت وأنا مسافر من أمريكا، واتفتشت وأنا في الدوحة واتفتشت لما جيت مصر.

س: ما قصدك من إحراز تلك الأجهزة للسجائر الإلكترونية إذًا؟
ج: كنت فاكرها سجائر عادية فيب، وكنت هديهم للفرقة بتاعتي هنا على سبيل الهدية.

س: كيف تم ضبطك؟
ج:  أول ما وصلت فتشوا الشنطة بتاعتي وخدوا تسعة من سجائر الفيب وقالولي التسعة دول ريحتهم مش كويسة وعملولي محضر بيهم.

قضية سعد الصغير

س: ما مضمون الحوار الذي دار بينك وبين القائمين بضبطك؟
ج: أنا أول ما دخلت على فرد الجمرك لقيته بيسألني إنت معاك حاجة؟ وقلت له معايا سجاير فيب، لقيته قالي دول هيتجمركوا، وفعلا خد الشنطة وفتشوا ولقو فيها الفيب ده، وقلت لهم دي سجائر فيب عادية واخدها من واحد في أمريكا، لقيت واحد من الجمرك مسك تسعة سجائر فيب وقالي دول ريحتهم مش حلوة، قلت له هم كلهم فيب زي بعض، قالي لا التسعة دول ريحتهم مش كويسة.

س: ما سبب قيام سالفي الذكر بضبطك إذًا؟
ج: عشان هم بيقولوا إن فيه تسعة سجائر من الفيب ريحتهم مش كويسة.

س: صف لنا المضبوطات التي عثر عليها بحقائبك تحديدًا؟
ج: أنا كان معايا بالضبط تسعة سجائر إلكترونية اللي اداهم لي راغب هدية للفرقة بتاعتي، وبتاع الجمرك شاف فيه تسعة منهم قالي إن ريحتهم مش كويسة، وهم شكلهم زي الباقي عادي، ألوان مختلفة وأشكال مختلفة وجواهم سائل فيب عادي.

س: ملك من تلك المضبوطات؟
ج: هم بتوع واحد اسمه رأفت وهو اداهم لي هدية.

س: ما سبب ضبطها بحوزتك بميناء القاهرة الجوي آنذاك إذًا؟
ج: أنا كنت واخدهم أفرقهم على الفرقة بتاعتي عشان فاكرهم سجائر فيب عادية.