والد رامي الجمل لـ القاهرة 24: لدينا ثقة في السلطات المصرية والسفير تواصل معي وأبلغني بتعازي الخارجية
قال يحيى الجمل والد الشاب المتوفى في إيطاليا رامي الجمل، أنا فقدت ابني ومنتظر تحقيقات النيابة، وعندنا ثقة في القضاء، وعندي ثقة أكتر وأكتر في السلطات المصرية، والحمد لله، السفير المصري الدكتور بسام راضي اتصل بي وعزاني، وأبلغني تعازي الدكتور بدر عبدالعاطي وزير الخارجية والمصريين بالخارج والقنصل العام لقنصلية مصر في ميلانو الدكتور منال عبدالدايم بلغتني التعازية.
وأضاف الجمل في تصريحات لـ القاهرة 24: أنا مش طالب غير العدل والحقيقة بالنسبة لوفاة ابني رامي، فإن وفاة ابني رامي وفاة في حادثة وطبعا حاليا في التحقيقات، وابني محترم وصل هنا وهو عنده 8 سنين درس وأخد الدبلومة واشتغل، لسه شغال السنة دي قبل ما يموت ما يكملش سنة.
وتابع: في الويك اند بيسهر مع زميله بيحضر عيد ميلاد ولا حاجة، فما كانش هيركب أساسا الموتوسيكل ده، كان فيه ولد راكب قاله أنا عايز اركب وأنتوا تعالوا ورايا بقى بالعربية، عربيات أصدقائه وزميله، علشان أنا عايز أعمل ستوري على الانستجرام، وكان لابس الخوزة وكل حاجة، وأخذ الصورة، فطبعا قابلهم كمين زي ما عندنا طبعا بيوقفوا بيكشفوا على الرخصة.
وأردف: رامي ميعرفش حاجة ملوش أي ذنب، تقريبا الولد مكنش معاه رخصة فقام جارى، فطبعا دول شباب صغيرين، هما جروا خلفه، أحنا مش عايزين نتهم إلا لما تبان الحقيقة ونتحرى الدقة قبل ما ننشر أي حاجة تضر ابنى في التحقيقات.
واختتم: أنا عندي ثقة في سيادة الرئيس عبد الفتاح السيسي أنه هو رئيس المصريين في الداخل وفي الخارج وأنا كده كده أنا كنت في الداخل قبل ما أروح للخارج، أنا خدت ولادي علشان طبعا عليه مصاريف وكان جواز بنتي وحاجات من دي علشان أحسن داخلي خدت ولادي معايا كانوا صغيرين وتعلموا الحمد لله أحنا أسرة تشرف المصريين وليس علينا أي غبار.
