حليمة وبلال.. قصة اعتناق زوجين ألمانيين الإسلام بمساعدة مصرية: يكفلان فتاة ويشاركان في إطعام المساكين
حصد فيديو لزوجين ألمانيين خلال اعتناقهما الإسلام في الأزهر الشريف، إعجاب متابعي مواقع التواصل الاجتماعي، حيث دخلا الإسلام بمساعدة فتاة مصرية تدعى بسنت إسماعيل، بعد 10 سنوات من صداقتهم.
الزوجان زارا مصر لأول مرة في 2015
وقالت بسنت إسماعيل في تصريحات لـ القاهرة 24: اتعرفت عليهم في 2015، أنا خريجة ألسن ألماني وكنت بدور على أجانب أمارس اللغة معاهم، وتواصلت معاهم وبعدين نزلوا مصر لأول مرة في 2015، ودعيتهم عندي للبيت ومن ساعتها بقوا يترددوا على مصر كتير وبستضيفهم عندي في البيت.
وتابعت بسنت: اتعرفوا على العيلة المصرية وكرم الضيافة بقوا يقعدوا مع جيرانا وفضلوا كدا لحد 2022، وبعدين بدأت اتكلم معاهم في إنهم يستقروا في مصر، هما مالهمش عيلة في ألمانيا عايشين لوحدهم ومفيش ود هناك كمان، واقتنعوا وعاشوا في مصر، وبقالهم سنة و8 شهور في مصر.
وأوضحت: اتعرفوا خلال الفترة دي على مسلمين كتير وهما لهم أصحاب مسلمين ألمان، وبدأوا يقرأوا عن الدين الإسلامي ويشوفوا المسلمين بيتعاملوا إزاي، فقرروا يدخلوا الإسلام.
قصة اعتناق زوجين ألمان الإسلام
وأضافت بسنت: بلال عنده حوالي 68 سنة وكان بلا ديانة، وزوجته عندها 55 سنة، كانت مسيحية بس كانت هي كمان مقتنعة بنفس أفكار زوجها، وبلال هو اللي خد القرار الأول، وبعدين تاني يوم حليمة، بعد ما قعدت معاها حوالي 5 ساعات نتناقش.
تبني فتاة مصرية
وتابعت: هما متكفلين بمصاريف بنت مصرية من المرج، متبنيينها من وهي عندها 12 سنة، عن طريق إحدى الجمعيات، وكانوا بيبعتولها كل المصاريف الخاصة بيها، ولما نزلوا مصر شافوها أول مرة في 2015.
واختتمت: كمان كانوا بيحبوا يشاركوا في إطعام المساكين وأعمال خير كتير، ولما نزلوا مصر واستقروا فيها اشتغلوا مدرسين لغة ألمانية في الأكاديمية عندي، واتعرفوا وقربوا من الشباب هناك، وكمان الشباب عرفوهم عن الإسلام أكتر، ودا خلاهم يحبوه وياخدوا قرار اعتناق الإسلام.
