ننشر أقوال مدير مركز صيانة بالشيخ زايد المعتدى عليه من المخرج محمد سامي | خاص
حصل القاهرة 24 على نص التحقيقات في قضية اتهام المخرج محمد سامي بالاعتداء على صاحب مركز صيانة سيارات بالشيخ زايد، بسبب حدوث تلفيات لسيارته داخل مركز الصيانة.
قضية المخرج محمد سامي
واستدعت جهات التحقيق مدير مركز الصيانة المعتدى عليه من المخرج محمد سامي لسؤاله عن الواقعة، وجاءت أقواله كالتالي: اسمي أحمد،م،أ،ف، عندي 24 سنة، طالب بهندسة جامعة أم إس إيه بالفرقة الخامسة ومدير محل أوتورات لأفلام حماية وعزل السيارات.
س: ما قولك فيما هو منسوب إليك من أنك متهم بسب المجني عليه محمد سامي بألفاظ تتضمن خدشها للشرف وذلك على النحو المبين بالتحقيقات؟
ج: محصلش
س: ما قولك فيما هو منسوب إليك من أنك متهم بالتسبب بإهمالك في إتلاف السيارة المملوكة للمجني عليه محمد سامي وذلك على النحو المبين بالتحقيقات؟
ج: محصلش
س: ما قولك فيما هو منسوب إليك بالاعتداء على المجني عليه محمد سامي وذلك على النحو المبين بالتحقيقات؟
ج: محصلش
س: اذكر لنا تفصيلات ما حدث؟
ج: اللي حصل أني شغال مدير لتركيب أفلام حماية للسيارات وصاحب المركز اسمه أحمد، ا، ويوم 2024/7/14، تواصل مع الأستاذ أحمد، ا، واحد اسمه محمد سامي على الفيس بوك وبلغه أنه عايز يعمل حماية كاملة للعربية بتاعته وساعتها الأستاذ أحمد قاله تمام وأن المركز هيعمله عزل حراري للزجاج ونانو سيراميك للفرش وجارفين للفيبر والجنوط مجانا واتفق مع الأستاذ أحمد أنه يجيب العربية تاني يوم الصبح الساعة 10 وإحنا بنفتح المحل الساعة 11 وأنا نزلت بدري اليوم ده عشان استلم العربية.
وأضاف المجني عليه، فعلا جالي الأستاذ محمد سامي ومدير أعماله اسمه كريم وسلموني العربية وساعتها أنا عاينت العربية بتاعته ومكانش فيها أي تلفيات وبعد ما استلمت العربية منه بلغني الأستاذ محمد سامي أنه محتاج العربية يوم الأربعاء 2024/7/17، وأنا يومها خليت الصنايعة يشتغلوا فيها ويوم 17 الأستاذ محمد جه واستلم العربية مني الساعة 10 بالليل وكان فيها حاجات لسه مخلصتش لأن المدة غير كافية واللي كان ناقص فيها القوايم اللي بين البيبان بتاعة العربية.
وأكمل المجني عليه: واليوم ده كان الأستاذ محمود.ا، أخو صاحب المركز موجود والأستاذ محمد سامي قاله ده غبي وأنا مش عايز اتعامل معاه والأستاذ محمود ساعتها هداه وقاله اللي أنت عايزه هيتعمل وساعتها استلم العربية يوم 22 - 7 ـ 2024، جالي السواق بتاعه عشان يسلمني العربية تاني ونصلح الحاجات اللي ناقصة وساعتها غيرنا للعربية الحماية للجزء الخلفي كله والإكصدام اللي قدام والسقف والفوانيس والشبكة وعملنا كل البيانوبلاك اللي في العربية والعزل الحراري.
وواصل المجني عليه: وساعتها السواق بتاعه مؤمن اتفق معايا إن فيه حد هيجي يستلم العربية يوم الخميس 25 ـ 7 ـ 2025، وفي اليوم ده إحنا خلصنا شغل في العربية حوالي الساعة 10 الصبح واستنيت لحد الساعة 4 العصر محدش كلمني ولا جه استلم العربية وأنا كلمت مؤمن قلتله مين هيجي يستلم العربية.
وأردف: مؤمن قالي أنه مسافر وهيشوف مين هيستلم العربية بداله وساعتها مدير أعمال محمد سامي اللي هو اسمه كريم كلمني وقالي أنهم عندهم تصوير ومش هيقدر يستلم العربية وأنا ساعتها فهمته أن عليه التزامات مالية خاصة بدفع تمن الخامات اللي اتعملت في العربية للشركة وأنها لازم تتدفع ولو جزء من تمن الشغل اللي في العربية.
