أولياء أمور يشتكون من اعتداء طلاب على أبنائهم الصغار داخل مدرسة بالقاهرة: سرقوا ولادنا ورموا البنات على السلم
اشتكى أولياء أمور بعض الطلاب في مدرسة بالقاهرة من تعرض أبنائهم في الصف الثالث الابتدائي للضرب على يد طلاب الصف الثالث الإعدادي، وذلك دون وجود أي تحرك من جانب إدارة المدرسة.
أولياء أمور يشتكون من اعتداء طلاب على أبنائهم الصغار داخل مدرسة بالقاهرة
وقالت والدة الطفل أدهم لـ القاهرة 24: طلاب الصف الثالث الإعدادي، اعتدوا على أطفال بالصف الثالث الابتدائي، ورموا البنات على السلم، وضربوا طفل وتعرض لارتجاج في المخ، وضربوا ابني من غير أي سبب، وحتى مدير المدرسة مش عارف يسيطر على الطلاب.
وأضافت: وتاني يوم روحت المدرسة عشان اشتكي، قالولي روحي الإدارة مش هيعملوا حاجة، والموضوع كبير والعنف في المدرسة دي من سنين، وأنا بعاني مع ابني وبقا يخاف من كل المدرسين، بسبب العنف اللي في المدرسة، والمعلمين بيعتدوا على الطلاب اللي مش بياخدو دروس، لدرجة أن فيه معلمة بتجبر أولياء الأمور أن ولادهم ياخدوا عندها درس.
ومن جانبها، قالت والدة الطفل محمد إسلام: ابني طلع من الفسحة لقي طلاب بالصف الثالث الإعدادي بيفتشوا في شنط الأطفال، ونزل تاني يستنجد بحد ملاقاش، ولما طلع رجعوا تاني وقفلوا عليهم الفصل، وضربوا كل الأطفال ورموا البنات من على السلم، وسرقوا فلوس وموبايلات ولانش بوكس من الأطفال بالفصل، وإدارة المدرسة معملتش حاجة، ومفيش أي مبرر لاعتداء الطلبة على الأطفال.
