خالد أنور: "بضع ساعات في يوم ما" أفضل الأفلام اللي اشتغلت فيها.. ومش خايف من المنافسة
تحدث الفنان خالد أنور عن مشاركته في فيلم بضع ساعات في يوم ما، مشيرًا إلى أنه انتهى من تصوير الفيلم منذ عامين ونصف، والسبب وراء تأخر عرض الفيلم هو اختيار المنتج أحمد السبكي للوقت المناسب للعرض.
وأعرب خالد أنور في تصريح خاص لـ القاهرة 24 عن سعادته للمشاركة في فيلم بضع ساعات في ويوم ما، قائلًا: من أفضل الأفلام الـ أنا اشتغلت فيها، وهو قديم أوي، بمعنى إننا مخلصين تصويره من سنتين ونص، والمنتج أحمد السبكي كان مستني الوقت المناسب.
فيلم بضع ساعات في يوم ما
وأضاف خالد أنور أن الفيلم مقتبس من رواية الكاتب محمد صادق، معقبًا: عادة جمهور القراءة بيقول إن الرواية بتكون أحلى من الأفلام، بس الرواية دي مختلفة، الفيلم أحلى من الكتاب أو نفس المستوى، خاصة أن كاتب الرواية محمد صادق هو نفسه كاتب السيناريو والحوار، والفيلم بيتكلم عن النفاق والأمراض وعيوب السوشيال ميديا وتفاصيلها، واجتماعيات الناس، والكذب، والفيلم متناقش بشكل كويس.
وتحدث خالد أنور عن عرض الفيلم مع وجود العديد من الأفلام المنافسة، قائلا: مش بخاف من فكرة إن الفيلم نازل مع أفلام كتير، أصل هخاف من إي؟.. ميعاد نزول الفيلم ده لعبة المنتجين والموزعين، وربنا يكرم الجميع والأفلام اللي نازلة كلها حلوة وفي الأول وفي الآخر ده نجاح للسنيما المصرية بشكل عام، في ظل اللي بنشوفه في الأيام دي فده مكسب للجمهور والمجتمع، أهم حاجة يكون الفيلم حلو ده اللي أنا بسعى ليه سواء هعمله أو هدعمه، وأهم حاجة إننا نعمل أفلام حلوة.
