بسمة بوسيل: عملت تضحيات كتير علشان عائلتي.. وبعد طلاقي معيطتش وكملت مشواري الفني
تحدثت الفنانة بسمة بوسيل عن انفصالها وطلاقها من الفنان تامر حسني، والد أبنائها، مؤكدة طيب العلاقة بينهما بعد الطلاق، وتفاصيل عودتها إلى الفن مرة أخرى.
وقالت بسمة بوسيل في تصريحات تليفزيونية: مكنش ينفع أغني وأنا متجوزة، ورجعت أغني بعد الطلاق، وأنا ولادي وعائلتي عندي بالدنيا، وكل حاجة عدت كانت مستاهلة اللي عملته، ومفيش حاجة اسمها استراحة محارب، هو أنا كنت بحرر أرض محتلة؟، أنا رجعت علشان حبي للغناء.
وأضافت بسمة بوسيل: وأنا صغيرة كنت عارفة أن العائلة أهم حاجة بالنسبة ليا، ولما كبرت وعملت كل حاجة علشان أفضل في العلاقة ومنفعش مشيت مع الحياة، ومقعدتش أعيط وأقول مش هعرف أعمل حاجة، دورت أنا عايزة إيه ورجعت للغناء، أنا عملت في حياتي تضحيات كتير علشان عائلتي، ولكن زي ما ربنا بيأذن بالجواز بيأذن بالطلاق، وكل حاجة مكتوبة في كتاب مينفعش نهرب منها.
وأردفت: تامر حسني داعم ليا، ولو فيه أغنية عجبتني واتباعت بكلمه، وهو بيحاول ميخليش حاجة في نفسي، ومهندسين الصوت بتوعي هما مهندسين الصوت بتوعه، وأنا عندي 33 سنة، ومفيش حاجة عملتها ومكسبتش منها، أنا حاليًا مركزة أوي في الغناء، وعايزة يبقى عندي فن والناس بتسمعني بجد وتحس باللي عايزة أقوله.
آخر أعمال بسمة بوسيل
وتعيش بسمة بوسيل حالة من النشاط على المستوى الفني، ونشرت مؤخرًا أغنية هبدأ أعيش، وعيشنا وشفنا، وغيرها من الأغاني التي حققت نجاحًا كبيرًا وتخطت حاجز الملايين من المشاهدات عبر يوتيوب ومختلف المنصات.
