يعاني ثقبا في القلب وتكاليف العملية مرتفعة.. والد طفل بالمنوفية يستغيث لعلاج ابنه
استغاث محمد صلاح، المقيم بمركز شبين الكوم محافظة المنوفية لتشخيص حالة ابنه صلاح، 5 سنوات، وإجراء عملية ثقب في القلب، تحتاج لتكاليف علاجية باهظة.
أب يستغيث لإجراء عملية لابنه
وقال والد صلاح في تصريحات خاصة لـ القاهرة 24، إن ابنه منذ ولادته يعاني من انسداد الشريان الرئوي، ويعاني من ضيق التنفس في عمر الشهور، وعندما لجأوا لدكتور أمراض قلب، تم تشخيصه بـ ثقب في القلب، بعد عمل الأشعة اللازمة، ما يتطلب إجراء جراحة لعلاج ثقب القلب وتكاليف علاجية مرتفعة.
وأضاف: حالة ابني بدأت تتدهور أكثر ولازم يعمل العملية في السن ده عشان بعد كده هتسببله خطورة، وحاليًا نفسيته تعبت ومش بيلعب مع صحابه، وخايفين عليه يطلع سلم أو يبذل أي مجهود يعرضه للخطر، ولجأنا لدكتور أمراض قلب وطلب نعمل العملية في أسرع وقت لأن الطفل محتاج رعاية متخصصة.
واستطرد الأب حديثه عن حالة ابنه، موضحا أنها يوما عن يوم تسوء: مفيش جديد خالص ولا أي تقدم، لازم يعمل العملية، والتكاليف كتير عليا، كل شهر بدفع 2000 جنيه علاج، وبعمل أشعة رسم قلب كل 15 يوم بـ 1500 جنيه، وحاليا ظهرت مضاعفات أكثر على الطفل وحالته مش مستقرة خايفين عليه يحصله حاجة.
وفي ختام حديثه استغاث الوالد لعلاج ابنه قائلًا: بقالنا شهر ونص، بنشوف حد يدفعله مصاريف العملية ومفيش جديد في الحالة وابنى تعبان جدًا، وربنا يعلم أنا جمعت حق الأشعة دي إزاي، مش عارف أعمل إيه.
وناشد والد الطفل صلاح بالحصول على تكاليف علاج ابنه بسبب تدهور ظروفه الصحية وحاجته للعلاج، معقبًا: نفسي حد يساعدنا في مصاريف علاج الولد لأن حالته صعبة ومش قادر أشوفه كل يوم تعبان ومش بإيدي أعمل حاجة لأبني.
