سارة سلامة: أنا ضد فكرة الانتشار.. ومتعتي في تقديم أدوار حقيقية من مجتمعنا
كشفت الفنانة سارة سلامة، عن معاييرها في اختيار أدوارها الفنية، مؤكدة أنها ضد فكرة الانتشار في عدد من الأعمال دون تحقيق بصمة لدى الجمهور.
وقالت سارة سلامة، في ندوتها بـ القاهرة 24: أنا ضد فكرة الانتشار وخلاص، التمثيل متعته إنك تقدمي الشخصية من مجتمعنا، وأنا بعمل الدور لو شدني ولازم أكون أنا حباه وحاسة أنه هيضيف ليا حاجة في حياتي الفنية، أنا اعتذرت عن حاجات كتير في حياتي وحاجات كان نفسي أعملها، فالأدوار اللي بتجيلي شبه بعض بعتذر عنها على طول.
سارة سلامة: مش هعمل إغراء تاني
وأكدت سارة سلامة، أنها لن تقدم أدوار إغراء مرة أخرى، قائلة: مش عايزة أعمل أدوار إغراء تاني، والمشاهد الخارجة خط أحمر عندي ومش هقدر أعملها، وياريت المخرجين يشوفوا أني مينفعش أعمل نفس الدور ولا إني أقدم إغراء تاني، المخرج أهم حاجة في العمل ولازم يكون قوي علشان يطلع منك حاجة حلوة ويظهرك بشكل حلو، وده سبب رفضي لأعمال كتيرة جدًا الفترة اللي فاتت، لأنها مكررة.
سارة سلامة: جالي ورم في المعدة بسبب الضغط النفسي
وفجرت الفنانة سارة سلامة، مفاجأة لأول مرة، عن إصابتها بمرض في المعدة بسبب الضغط النفسي وشعورها بالظلم، مشيرة إلى أنها كانت فترة صعبة في حياتها، قائلة: أنا جالي مشاكل في المعدة، شبه ورم وده بسبب الضغط الكبير عليا وأنا حسيت إني مظلومة، وقعدت فترة كبيرة مبعملش حاجة في حياتي غير أني بقرب من ربنا.
