أنت مش عارف بتكلم مين؟.. أقوال طبيب عين شمس المُعتدى عليه من محمد فؤاد في التحقيقات| انفراد
حصل القاهرة 24 على نص التحقيقات في قضية مشاجرة مستشفى عين شمس، بين الفنان محمد فؤاد، والطبيب مصطفى. أ، في 20 أغسطس الماضي.
قضية مشاجرة محمد فؤاد وطبيب مستشفى عين شمس
وجاءت أقوال طبيب عين شمس كالآتي: أنا اسمي مصطفى.ا.م، عندي 28 سنة وأعمل طبيبا بقسم القلب مستشفيات جامعة عين شمس.
وبسؤاله عن تفاصيل شكواه أجاب: اللي حصل إن أنا شغال مدرس مساعد القلب في مستشفى عين شمس التخصصي، وأنا كنت نوبتجي الطوارئ الخاص بمستشفى عين شمس، وحوالي الساعة 5 الفجر بلغوني في الاستقبال إن فيه مريض قلب عنده ألم بالصدر؛ فخرجت من غرفة أطباء القلب اللي موجود في الاستقبال برضه وروحت إلى المريض على السرير بتاعه، وهو أداني رسم قلب كان عامله خارج المستشفى.
وأضاف: وسألته عن طبيعة الألم اللي عنده وتاريخه المرضي، وعما إذا كان يعاني من أمراض القلب أو السكر أو الضغط؟ فقالي إن أنا عندي الألم بالصدر من الساعة 12 بليل تقريبًا، وإن هو مدخن وكان عمل دعامه قبل كدة في الشريان الأورطي.
وأكمل: وبعد كده بصيت في رسم القلم اللي كان عمله بره المستشفى فلقيت في شبه جلطه في الشريان التاجي؛ فعملنا رسم قلب جديد عشان أشوف الحالة وصلت لإيه؟ فتبين لي برضه ‘ن الجلطة ما زالت موجود وإنه لازم يتعمله قسطرة عشان يركب دعامات.
واستطرد طبيب عين شمس: بعدها بلغت واحدة ست كانت معاه إنه لازم يخش غرفة العمليات عشان يتعمله قسطرة، والمريض كان سامع الكلام ده وبعد كدة خرجت من الغرفة اللي فيها المريض، وروحت على الاستقبال علشان أكتب التقرير اللي هياخده أهالي المريض، علشان يعمله إجراءات تسجيل الدخول.
وأوضح: وبالفعل الست اللي كانت مع المريض خدت التقرير وخرجت بره؛ علشان تعمل إجراءات تسجيل الدخول، وأنا خدت تذكرة المريض اللي مكتوب فيها اسمه وسنه واللي دخل بها الاستقبال؛ علشان أكتب تقرير طبي بالحالة واحتياجاتها، وفي نفس الوقت، وأنا بكتب التقرير ده كنت برن على الاستشاري اللي هيعمل عملية القسطرة.
وأردف، في الوقت ده لقيت واحد دخل سلم عليا وأنا سلمت عليه، ومكنتش أعرف هو مين؟ لأني كنت مشغول بكتابة التقرير والاتصال بالاستشاري علشان سرعة إجراء القسطرة، وسألني عن الحالة وظروفها إيه؟ فرديت عليه قولتله إن هو عنده خلل في الشريان التاجي ومحتاج يعمل قسطرة، فقالي ممكن ياخذ أدوية؟ قولتله لا؟! الحالة ملهاش حل غير القسطرة، فقالي إحنا معانا حقنة جايبينها معانا ممكن تدهاله تفك الجلطة، قولتله لا مفيش حاجه اسمها كده؟! ولكن وريني أشوف الحقنة.
وتابع طبيب عين شمس: فقالي أنت عارف إنه مركب دعامه قبل كده؟ قولتله آه بس دي ملهاش علاقة بالوضع الحالي، فقالي بعد كده أنت صاحي ولا نايم ولا أنت مش فايق، ولا أنت فين، ولا مش عارف أنت بتكلم مين؟ فقولتله أنا معرفش حضرتك مين ومينفعش تزعق في الطوارئ عشان المرضى.
وأوضح: فلما قولتله كده شتمني وراح ضربني برجله في رجلي، من تحت وجه واحد من الأمن وقف ما بينا فقولتله بعد إذنك متشتمش، وزعقت وقولت الأمن يخرجوا الراجل ده بره، فراح شتمني وبعدين، لقيت الأمن واخدني يرجعني ورا شوية، هو والناس اللي كانت معاه وأخدينه، وشوية لقيت الناس اللي كانت مع الراجل ده بتزعق وتشتم وعايزين يعتدوا عليا.
وأشار طبيب عين شمس: بعدها الأمن خدني دخلني في إحدى الغرف الموجود فيها سراير، وفي الوقت ده الناس اللي كانت مع الرجل ده كانوا عايزين يخشوا يضربوني، ولكن الأمن والمواطنين اللي كانوا في الاستقبال كانوا بيحوشوا، وبعد كده لما الدنيا هديت وطلعت بره في الاستقبال؛ عرفت إن الراجل اللي كان بيشتمني وضربني هو الفنان محمد فؤاد، وعرفت إنه المريض يبقا أخوه، واتفاجئت إن محمد فؤاد خد أخوه المريض من المستشفى وكل الناس اللي كانت معاهم ومشيوا، وبعد كده عملت مذكرة وجه ضابط من قسم شرطة الوايلي سألني في المحضر، وده كل اللي حصل.
