إنجي المقدم: معملتش عمليات تجميل أنا كبرت.. وغيبت عن الساحة لأني أُنهِكت
علقت الفنانة إنجي المقدم، على الانتقادات التي طالتها بعد عرض مسلسل وتر حساس، بسبب التغيير الذي طرأ على شكلها، بجانب الكشف عن سبب غيابها عن الساحة الفنية الدرامية طوال الفترة الماضية.
وقالت إنجي المقدم، في لقائها مع الإعلامية إنجي علي في برنامج أسرار النجوم، المذاع عبر نجوم FM: أنا معنديش شفايف خالص، وعاملة شفايفي من 2013، وأنا مش ضد التجميل والرتوش، ومهم أوي أن الست تحس أنها حلوة ومرتاحة وواثقة من نفسها، خاصة لو بتطلع على الشاشة، أنا ضد التغيير التام لنفسي لأن خلقة ربنا مفيش أحسن منها، ولكن شوية رتوش لذاذ.
وتابعت إنجي المقدم: كنت ممكن أعمل بوتكس وفيلر في مناطق معينة في وشي، جربتهم قبل كده ومعجبونيش، مبعملش فيلر وبوتكس من 4 سنين، كل اللي بعمله سكين بوستر، وده بيعمل نضارة للبشرة، أنا عملت فيلر وبوتكس من 4 سنين واشتغلت دلوقتي على الحاجات الطبيعية أكتر علشان أعرف أعبر وأمثل، أنا طبيعية في الحياة العادية، ولكن ممكن في وتر حساس تتشاف مش طبيعية بسبب الزوايا والإضاءة، معظم الستات بتحب تحلي نفسها وتشتغل على نفسها، أنا معملتش حاجة، أنا كبرت وكلنا بنكبر.
إنجي المقدم تكشف سبب ابتعادها عن الساحة الدرامية
وعن سبب ابتعادها عن الساحة الدرامية، علقت إنجي المقدم: الأول كنت طالعة من مشروعين مهلكين بالنسبة ليا جدًا، وهما قواعد الطلاق الـ45 وستات بيت المعادي، صورتهم في نفس الوقت ودول هلكوني وطلعت منهم تعبانة حقيقي ومحتاجة راحة.
وواصلت: أنا بحب الشغل في رمضان وببقى حريصة عليه، ولكن لأول مرة قلت مش قادرة ومش هشارك في رمضان، فكان الموضوع باختياري، وبعد كده بدأ يتعرض عليا حاجات مش حباها أنا عايزة أرجع بحاجة مختلفة أكتر وأقوى من اللي كان بيتعرض، لغاية ما سنة ورا سنة لقيت الوقت بيجري وبيعدي وأنا قاعدة حاطة رجل على رجل وبتفرج على اللي بيتعرض، وعايزة أشتغل ولكن مفيش حاجة اتعرضت عليا بترضيني.
واستكملت: أنا مش عايزة أكون موجودة وخلاص، وده مكنش هيتحقق من اللي اتعرض عليا وقتها، وفي الأثناء دي عملت فيلم كاملة هو فيلم مهرجانات واتعرض على نتفليكس، وده كان مشروع حباه أوي، ورمضان اللي فات كان في مشروع تحمست له ولكن متوفقناش في الاتفاقات.
