طارق عبد الحليم: أوحش جيل في الغناء هو جيلي.. واتأخرنا بسبب عدم مساعدتنا لبعض
أعرب المطرب طارق عبد الحليم، عن استيائه بسبب عدم مساعدة أبناء جيله لبعضهم البعض في مشوارهم الفني، واصفًا إياهم بـ الجيل الأوحش في الوسط الفني.
وقال طارق عبد الحليم، في لقائه مع القاهرة 24: أوحش جيل في الغناء هو جيلنا، لأن الجيل ده نجح جدًا ولكن أنا بشفق لأن كلهم عندهم روح النجومية الأحادية ومفيش كده، أنا بقول شابوه لـ الجيل اللي قبلنا والجيل اللي بعدنا، وفي مننا اللي نط زي الليثي وراح انضم للشباب الجديد، إحنا اتأخرنا علشان مبندعمش بعض.
طارق عبد الحليم: حافظ 3 أجزاء من القرآن
وكشف عن إمكانية تسجيله للقرآن الكريم بصوته كصدقة جارية، موضحًا أنه لا يحب الإفصاح عن الأمور الدينية لأنه يعتبرها خاصة بينه وبين الله ولا يحق لأحد التدخل بها، قائلًا: أنا بقرأ القرآن لنفسي وبين نفسي، لأني مبجودش فيه، أنا برتله ترتيل عادي، لأن قراءة القرآن لها دراسة ولها بحر وتجويد، أنا بقرأ زي كل الناس.
وتابع: مش علشان أنا مطرب يبقى هعرف أقرأ بالتجويد، حاولت ولقتني بغني القرآن، قلت لأ أنا هتهبل ولا إيه؟.. اللي بيني وبين ربنا ليا وأنا حافظ 3 أجزاء من القرآن، ولو سجلت القرآن الكريم بصوتي هيكون ليا مش للنشر للجمهور.
