بسام دكاك عن اعتقاله بسجن صيدنايا: اتكهربت وطفوا السجائر في ظهري.. وزهير رمضان قالي هنفيك لسابع أرض
كشف الفنان السوري بسام دكاك، تفاصيل مؤلمة عن اعتقاله في سجن صيدنايا في سوريا، وتفاصيل شطبه من نقابة الفنانين السوريين وتوعد زهير رمضان له بعدم العمل في الفن مرة أخرى.
وقال بسام دكاك، في تصريحات تليفزيونية: سنة 2013 كنت في مستشفى مع عائلة معرفهاش، وفيه عقيد قالي عازمك على قهوة، وكانوا عايزيني أعترف على الشباب الأبطال اللي كانوا في حارتي وأنا معترفتش على حد، واعتقلت سنة و10 شهور بكل معايير الاعتقال من الذل والإهانة والمسبات والضرب.
وانهار بسام دكاك، قائلًا: ولادي الاتنين اتضربوا بالنار من النظام، واحد في وسطه والتاني في رأسه وربنا حماهم، كانوا بيتهموني إني بأوي الإرهابيين، طفوا السجائر في ظهري، وبصموني على ورق معرفش هو إيه وكان فيه أقوال مش بتاعتي، عايزنّي أعترف على الأبطال اللي حرروني ورجعولي كرامتي، طلعت من هنا على إدارة أمن الدولة واتمنعت أكمل وظيفتي وراتبي وقف، وممنوع أشتغل في التمثيل والفنانين بيقولوا عليا إرهابي.
وأضاف: ولاد إخواتي ماتوا، وولاد عمتي لسه في السجن، الناس بتسلم عليا وميعرفوش إيه اللي حصل فيا، قد إيه اتذليت وقد إيه اتشبحت بـ الجنازير في إيديا ورجليا، تخيل إني اتكرمت في العراق وحُربت.
وأضاف: أنا محروق قلبي من الشخص اللي طفى السيجارة في ظهري، وحطوا كابلات كهرباء في رجلي ووقفوني على مياه وكهربوني وأنا عاري، أنا فقير عايش من أجل كرامتي وحريتي، كنا نايمين 85 شخص في مهجع واحد وكانوا بيرموا علينا مياه باردة.
واستكمل: معترفتش على مخلوق من الثوار الأحرار اللي في منطقتي، ومأذيتش شخص، أنا سوري حر وهرفع رأسي للسماء، شغلوني أو لأ هما أحرار المهم انتصرنا، أنا شفت ناس قدامي بتموت، أنا لغاية دلوقتي بمشي في الطريق لو واحد بصلي بخاف منه بفتكره مخابرات، بقول حسبي الله ونعم الوكيل في كل شخص ظلمني.
بسام دكاك: بقبل بمشهد عشان أكل
وأوضح بسام دكاك، أن زهير رمضان، النقيب السابق لنقابة الفنانين السوريين، توعد بعدم عمله في الفن مرة أخرى، قائلًا: سنتين ببوس الإيدين علشان أرجع وظيفتي وأكل ولادي، ورفعت دعوى وقلت يا رب وكسبت الدعوى، وبيجبوني على 6 مشاهد وبيدني كام ألف وغيري بياخد ملايين، الفن كان محسوبيات ووسايط، دلوقتي بقيت بقبل بمشهد ومشهدين علشان عايز أكل، زهير رمضان قفل بابه وكان بيقولي هنفيك لـ سابع أرض.
