خالد النبوي: فكرت في اعتزال الفن بعد مسلسل واحة الغروب.. ودور طومان باي أنقذني
تحدث الفنان خالد النبوي عن سبب تركه للتمثيل ومغادرته مصر لـ فترة، حيث أكد أن السبب كان إحساسه بـ عدم القدرة على تقديم أدوار جديدة للجمهور، بجانب كشفه كواليس تحضيره لـ شخصية الرئيس الراحل أنور السادات بـ اللغة الإنجليزية.
وأكد خالد النبوي خلال ندوته في مهرجان القاهرة الدولي للفيلم القصير، بأن دور طومان باي كان طوق نجاه له للرجوع إلى التمثيل من جديد، مضيفًا: حسيت أني مش هقدر أمثل تاني وسبت مصر 59 يوما بالضبط، عاددهم، إلى أن جه دور طومان باي، دور كنت مستنيه وبحلم بيه من 20 سنة لأنه ممكن يكون أحلى قصة عرفتها في حياتي، أنقذني.. وكل الشخصيات اللي قدمتها أتعلمت منها وعيشت تجربتهم، وكمان كل ما امتلكت وعي كل ما اللي قدمتوا بقى أغلى بكتير.
ومن ناحية أخرى، تحدث خالد النبوي عن أضرار احتكار الميديا، قائلًا: احتكار الميديا لما يكون في مكان واحد هو اللي بيوزع يؤدي لكوارث زي محاولة اغتيال فنان كبير مثل نور الشريف، دا ثروة كبيرة أوي ومش فنان بيطلع كل سنة ولا عشرة.
تقديمه لـ شخصية السادات بالإنجليزية
في سياق آخر، تحدث خالد النبوي عن كواليس تحضيره لـ شخصية السادات، معلقًا: كانت بـ لغة تانية مش لغتي، سعتين إلا ربع على المسرح بـ لغة مش لغتك ولها إيقاع معين، وشخصية بتتكلم إنجليزي بطريقة الرئيس أنور السادات، وحدث جزء من إعادة التقييم ومناقشة الموضوع ده، وبدأت أتكلم في البروفات بطريقة السادات قالولي الجمهور مش هيفهم أوي، خصوصا إن احنا يومي السبت والأحد بيكون في عروض الصبح، العروض دي كان بيحضرها طلبة المدرسة والأساتذة، وإذا كان في جمهور مش هيفهمنا عليا إني أعمل مجهود خاص عشان المسرحية توصل إليهم، وإننا نتعاون كفريق عمل.
