أول تعليق من المدرسة صاحبة عيد الميلاد بعد تصدرها التريند: تفاجأت بما فعله الطلاب ورد فعل الناس
خلال الأيام الماضية، تداول مستخدمو مواقع التواصل الاجتماعي، مقطع فيديو عبر موقع فيسبوك، يحتفل فيه عدد من الطلاب بعيد ميلاد مدرسة في إحدى المدارس، وتواصل القاهرة 24 من الدكتورة أمنية الديب، منسق ومدرس فيزياء بإحدى المدارس الدولية بالإسكندرية لسرد تفاصيل الفيديو المنتشر بالسوشيال ميديا.
أول تعليق من المدرسة صاحبة عيد الميلاد بعد تصدرها التريند
وقالت الدكتورة أمنية الديب، منسق ومدرس فيزياء بإحدى المدارس الدولية بالإسكندرية، والتي ظهرت عبر مقطع فيديو خلال احتفال طلابها بها، في تصريحات خاصة لـ القاهرة 24، أنا تفاجأت برد فعل الناس على السوشيال ميديا وتفاعلهم مع الفيديو، وسعيدة جدًا بكل كلامهم ليا.
وأضافت الدكتورة أمنية الديب: الطلاب متعودين على المفاجآت والاحتفال بعيد ميلادي، ولكن هذه المرة كانت المفاجأة أكبر، ومكنتش متوقعة اللي بيحصل، وكنت داخلة الفصل وسمعت صوت الخناقة، وطلعت أجري عليهم علشان أسكتهم قبل ما حد فيهم يتصاب، حتى مفكرتش أقلع الشنطة اللي كنت شيلاها، واتصدمت من رد فعل الطالب اللي رفع الكرسي وكان متحمس في الفيديو، لأنه في العادي مؤدب وخلوق وهادي، ووقتها أدركت إن في مشكلة كبيرة بين الطلاب.
وواصلت المدرسة صاحبة عيد الميلاد: دخلت في وسطهم وكنت بحاول أخلص بينهم، لأن بعتبرهم كلهم ولادي واخواتي، وبالفعل هما أصدقائي الصغيرين، وتخيلت ابني في نفس الموقف، وكان عندي يقين إن الولاد هيحترموني ويقفوا بعيد عن بعض، وبالفعل دا اللي حصل، وأدركت إنه مقلب، ثم فاجأوني بالاحتفال بعيد ميلادي.
واستكملت الدكتورة أميرة الديب: شايفة تفاعل الناس كلهم ومخضوضة من التريند، لأني بعيدة كل البعد عن السوشيال ميديا والتيك توك، وحتى أنا مكنتش أعرف إن الفيديو بيتصور، ولكن شايفة الموقف اللي حصل هو نتاج تعب وجهد في مهنة التدريس، وخاصة إن التعامل مع الجيل الجديد صعب.
واختتمت الدكتورة أميرة الديب: فكرة السيطرة عليهم في المدرسة بتكون صعبة، ودا دور المدرس من أول حصة، لازم يفرض عليهم احترامه وتقديره بدون تشدد، ولازم الطلاب يكونوا حابين ومحترمين المدرس، ودي معادلة صعبة إني أكون قريبة منهم وفي نفس الوقت لازم يقدروني، ودا بيتم من أول حصة، ومع المواقف يبدئوا يحترموني، وياخدوا رأيي في بعض الأمور الخاصة بهم، ودا بيفرق من طريقة تعامل المدرس مع الطلاب.
