أبرز تصريحات أيمن يهجت قمر: محمد رمضان مش نمبر 1.. وآخر ديك في مصر كان هينجح لو تامر حسني قدمه
حل السيناريست أيمن بهجت قمر ضيفًا على أحد البرامج التليفزيونية، وتحدث عن العديد من الأمور وعن رأيه في لقب نمبر 1 لـ محمد رمضان.
أبرز تصريحات أيمن بهجت قمر
وإليكم أبرز تصريحات أيمن بهجت قمر
-محمد رمضان مش نمبر 1، ولسه محققش إيرادات في السينما، ولو تامر حسني كان عمل فيلم آخر ديك في مصر كان هينجح، لأنه مش لايق على محمد رمضان.
-هيفاء وهبي فنانة استعراضية زي أي حد استعراض، مش لازم يكون عنده إمكانيات صوت، وصالحتها بعد ما قلت إن صوتها وحش.
-عندي مشكلة إني كل سنة في رمضان لازم أخسر حد، لأني في الصيام بضرب بالبونية وببقى مجنون، ودايمًا معاركي قبل الفطار ملهاش لازمة، زي لما قلت إني مبحبش محمد صبحي، وبعد الفطار اعتذرت على طول.
-تراجعت عن هجوم تامر حسني لأني كنت في كفة عمرو دياب أكتر، وكان في مقارنة بينهم، ولكن لما عرفت تامر حبيته عشان علاقته بوالدته وأصدقاءه.
-حذفنا مشاهد كتير من مسلسل فلانتينو علشان نريح الزعيم، وعلشان العمل يكتمل، والمسلسل توقف إنتاجيًا لمدة 8 شهور والزعيم كان فقد الشغف تجاه المسلسل، فكنا عايزين نريحه، وعملنا حلول سهلة علشان العمل يتم، وبكلمه كل فترة أطمن عليه.
-مفيش حد من أبناء الفنانين بيكمل في الفن إلا لو يستحق إنه ياخد فرصة.. والفن مفهوش واسطة.
أيمن بهجت قمر عن أزمة صوت مصر
وسبق وعلق أيمن بهجت قمر في تصريحات تليفزيونية عن الأزمة المتداولة بين لقب صوت مصر بين بعض الفنانين، قائلا: شيرين عبد الوهاب صوت شارع وحارة مصر وشبه الناس، وأنغام هي واجهة مصر المشرفة، واللي تطلع في أي حفلة فعلًا تشرف مصر بطريقة لبسها وكلامها وغُناها وثقافتها، وآمال ماهر حنجرة مصر، وروبي دلع مصر، مصر مليانة كل الأنواع.
