أحمد مراد عن فيلم الست: سيرة أم كلثوم متخلصش في 10 مسلسلات.. والجمهور انتقد منى زكي قبل رؤية العمل
تحدث الكاتب أحمد مراد عن أجدد أعماله السينمائية فيلم الست بطولة الفنانة منى زكي، والذي يتناول خلاله السيرة الذاتية لـ كوكب الشرق أم كلثوم، معربًا عن استغرابه الشديد لـ رد فعل الجمهور على العمل قبل طرحه.
وقال أحمد مراد في لقائه مع القاهرة 24: اللي نزل مكنش البوستر بتاع فيلم الست، لما بفكر في رد فعل الناس بستغرب شوية لأنهم لسه متفرجو.. بابلو سكوبار تاجر مخدرات مهم جدًا في كولومبيا اتعمل عنه عشرات المسلسلات.. هل أم كلثوم ميتعملش عنها غير عملين في الحياة؟، أعتقد ده شيء غريب شوية.
وأضاف أحمد مراد: المسلسل العظيم اللي اتعمل كان حلو جدًا، ولكن كل جيل محتاج المسلسل أو الفيلم اللي يتكلم بـ لغته، وإحنا بنحاول نقدم سيرة هي أصلًا متخلصش في 10 مسلسلات، لأن قدرة أم كلثوم في حياتها كانت كبيرة أوي، وفي زوايا كتير نتكلم فيها ونبرز حاجات لذيذة متشافتش قبل كده، أنا بدعو الجمهور يتأنى ويتفرج.
واختتم تصريحاته قائلًا: أنا بصراحة بدعم جدًا الفنانة منى زكي، لأني بفكر في المعاناة الكبيرة اللي بتعانيها في النقد ما قبل الرؤية، ده جديد بصراحة، ودايمًا بقولها خلاص سيبي الناس تعبر عن نفسها، وأتمنى لما يشوفوا الفيلم يعجبهم إن شاء الله.
فيلم الست
ويشارك في بطولة فيلم الست الفنانة منى زكي، محمد فراج، عمرو سعد، وغيرهم، والعمل من تأليف أحمد مراد، وإخراج مروان حامد.
