بعد إحالتهم للمفتي.. ننشر الاعترافات الكاملة للمتهمين بقتل وتقطيع مينا موسى ممرض المنيا
قضت محكمة جنايات شمال القاهرة المنعقدة بالعباسية بالأمس، بإحالة أوراق المتهمين في قضية إنهاء حياة مينا موسى ممرض المنيا، وتقطيع جثمانه بالزاوية الحمراء إلى المفتي، وتحديد جلسة 27 يناير للحكم.
الاعترافات الكاملة للمتهمين بقتل مينا موسي
وينشر القاهرة 24 الاعترافات الكاملة لـ قاتل مينا موسي ممرض المنيا أمام جهات التحقيق وتفاصيل وكيفية قيامه بقتله وتقطيع جثته إلى أشلاء، وإلقاء جثته في ترعة الإسماعيلية.
وقال المتهم الأول إبراهيم.ر، وجاءت كالآتي: اسمي إبراهيم دبلوم صنایع وبشتغل عامل في المنيا، لحد ما اتفتح قدامي مجال إني أكون جليس لكبار السن في القاهرة.
س: ما هي تفصيلات إقرارك بارتكاب الواقعة تحديدًا؟
ج: أنا من الضيقة اللي أنا فيها بدأت أفكر ازاي أجيب فلوس وفي يوم 28 / 9 / 2024 قبل يوم الواقعة مصطفى ابن خالتي جه يبات معايا في البيت اللي أنا شغال فيه، وكنت بتكلم معاه في الظروف الصعبة بتاعتي وإني محتاج فلوس قالي إن هو كمان ظروفه صعبة والدنيا مخبطة معاه، قعدنا نفكر نجيب فلوس ازاي لحد ما جه في دماغي إننا نستدرج حد نجيبه على البيت اللي أنا شغال فيه نسرقه عشان الحاج محمد اللي أنا شغال معاه مبيتحركش إلا لما أنا أسنده، وجه في بالي واحد كان كلمني من فترة كبيرة سألني على شغل مع حد مسن وأنا سجلت رقمه من ساعتها، فكلمته من خط مش متسجل عملت فيها واحدة ست، وقلتله إني محتاج حد جليس مع راجل كبير، بس هو قالي إنه شغال ورشحلي مينا واداني رقمه وقالي إنه كان بيدور على شغل.
وأضاف قاتل مينا موسى في التحقيقات: كلمت مينا موسى وعملت إني واحدة ست برضو وقلتله نفس الكلام إني محتاج حد جليس مع راجل كبير بمرتب 350 جنيه في اليوم، وقالي إنه جاهز وقلتله إنه هيبدأ من يوم 29 / 9 / 2024، واتفقت معاه إنه ييجي الساعة 11 الصبح وقلتله يركب مواصلات ميدان السواح وينزل عند مصنع، وقعدت أنا ومصطفى نتفق هنعمل إيه واتفقنا إن أنا هنزل أجيب مينا لما يوصل ومصطفى هيكون في البيت مستخبي ورا الباب ومعاه ماسورة حديد وأول ما ندخل أنا ومينا وأقفل الباب هو يهدد مينا عشان ميعملش صوت ونسرقه ونمضيه على وصل أمانة أو نطلب فدية.
وأكمل: يوم 29 / 9 / 2024 الصبح كلمت مينا وقالي إنه جاي في السكة ولما وصل عند المصنع اتصل بيا ووصفتله يمشي في الشارع اللي جمب المصنع ولما وصل عند البيت أنا كنت لسه مفهمه إني واحدة ست وقلتله إن في حد هيقابله تحت البيت وأنا كنت مستنيه وكان لابس تيشيرت أسود وبنطلون أسود وکوتش أسود، وخدته وقلتله إن الحالة في البيت فوق وطلعنا البيت في الدور الأخير وفتحت الباب ودخلنا أنا ومينا راح مصطفى طالع من ورا الباب وكان معاه الماسورة الحديد، قعد يضرب في مينا بالحديدة، ويهدده يقوله اقعد يلا لأموّتك لحد ما سيطر عليه ومصطفى بدأ يعمل اللي إحنا عايزينه وقلناله ينام في الأرض ويحط إيده ورا ضهره، ولما حط إيده ورا ضهره، أنا ربطت إيده بحبل لونه أصفر وربطت رجله بحبل نفس اللون، ومصطفى بدأ يقلب في جيوبه طلع تليفونه والمحفظة وفتحها كان فيها 500 جنيه خدهم، واتفقنا إننا نشوف حد من أهله نطلب فدية، وساعتها مصطفى قال أنا هروح الشغل أثبت حالة.
وتابع في اعترافاته: لما مصطفى نزل أنا سجلت تسجيل بصوت مينا بيقول فيه يا جماعة أنا كويس بس ابعتولي أي فلوس أبعتها للست اللي كنت رايح اشتغل عندها عشان مش عايزة تسيبني، وخدت منه رقم ابن عمه عشان يبعت فلوس بس ساعتها بدأ مينا يعلي صوته روحت ماسك الحديدة وبدأت اضرب فيه وقلتله لو مسكتش هموّتك.
وأضاف قاتل مينا موسى في التحقيقات: فضل برضوا يقول الحقوني الحقوني رحت جايب قماشة بيضة وربطت بقه عشان ميعملش صوت، ساعتها بدأ يخبط برجله جامد في الأرض وهو مربوط روحت ضربه على دماغه بالحديدة وقلتله لو مسكتش هموتك فضل برضوا يضرب برجله على الأرض وأنا ساعتها خفت حد يسمع وبدأت أضربه جامد بالحديدة على دماغه عشان أسكّته لحد ما لقيته جاب دم من بقه ومناخیره وفصل خالص واكتشفت إنه مات، كل ده والحاج محمد كان نايم جوا وأنا قافل عليه الباب، وكنت خايف إنه يحس بحاجة.
وأكمل المتهم بقتل مينا موسى ممرض المنيا في التحقيقات: بدأت أفكر أعمل إيه في الجثة سحبته خبيته في الحمام وبدأت أشوف أي حاجة أقطعه بيها، لقيت صفيحة منشار في البيت في الأوضة اللي فيها الكراكيب، خدتها ودخلت الحمام قلعته هدومه وبدأت أقطع فيه، قطعت رجليه أربع أجزاء، وقطعت درعاته، وبعد كده قطعت دماغه، وبعد كده كان في شوال أبيض بلاستيك في الشقة، خدته ودخلت الحمام وحطيت فيه الدماغ والدراعات، ونزلت كنت لابس تيشيرت لاموني وبنطلون بيج وشايل الشوال على كتفي طلعت من العمارة روحت على ترعة الإسماعلية فضيت الشوال في الترعة، ورجعت البيت غيرت الهدوم عشان جه عليها دم ولبست جلابية لونها كموني، وخدت الرجلين في الشوال ونزلت على نفس المكان فضيت الشوال في الترعة، وبعد كده رجعت ريحت شوية وخدت الجزء الأخير بتاع الصدر والبطن والخلفية كانوا حته واحدة حطيتهم في الشوال وجبت كيسين أسود بلاستيك كبار بتوع الزبالة قفلت بيهم على الشوال عشان الشوال مكنش مكفي الجزء ده، ونزلت برضو على نفس المكان في ترعة الإسماعلية وفضيت الشوال ورجعت البيت، خدت صفيحة المنشار والحديدة والحبال اللي كنت رابطه بيها وهدومه وهدومي اللي جه عليها دم تيشيرت لموني وبنطلون بيج وجلابية کموني ونزلت برضوا على نفس المكان في ترعة الإسماعلية وفضيت الشوال.
وتابع قاتل مينا موسى في اعترافاته: رجعت البيت غسلت الشوال بالماية ورميته من البلكونة، ودخلت نضفت الحمام ونمت لحد ما الصبح طلع يوم الاثنين 30 / 9 / 2024 وكل ده مكنش مصطفى جه، واتصل بيا الصبح سألني إيه الوضع قلتله الراجل مات قالي حد من أهله بعت فلوس قلتله لا، بعدها لقيت حد من أهله اتصل على الرقم اللي كلمت مينا منه وعملت واحدة ست عشان يسألني عليه وردیت علیه وعملت واحدة ست وقلتله إن إحنا خطفنا مينا ويبعت 120 ألف جنيه عشان يرجع بس مبعتش حاجة، وساعتها خدت تليفون مینا وشنطة هدومه وطلعت على غمرة كسرت التليفون هناك ورميته عشان كنت خايف يعمله تتبع وخدت الخط بتاعه والذاكرة بتاعت التليفون بتاعته احتياطي، وعديت بعدها عند محطة القطر في رمسیس وسيبت شنطة الهدوم بتاعة مينا هناك ورجعت على البيت نمت محستش بنفسي لحد ما الباب خبط يوم الثلاث ٢٠٢٤/١٠/١ حوالي الساعة 3 العصر قمت فتحت الباب لقيت حوالي 6 أفراد لابسين ملكي قالولي إنهم شرطة قالولي فين تليفونك؟ وخدوا تليفوني وعرفوا اللي حصل وخدوني معاهم وطلعنا قسم الزاوية لحد ما جابوني النيابة وهو ده كل اللي حصل.
